രാമന്റെ ഏദൻതോട്ടം (Review: Ramante Edanthottam)

രാമന്റെ ഏദൻതോട്ടം: നോട്ടം തെറ്റിയൊരേദൻ തോട്ടം!

ഹരീ, ചിത്രവിശേഷം

വിവാഹം കഴിഞ്ഞതോടെ സ്വന്തം സ്വപ്നങ്ങളും അഭിലാഷങ്ങളും കരയ്ക്ക് വെയ്ക്കേണ്ടി വന്നൊരു മുൻനർത്തകി, ഒരവധിക്കാലത്ത് ആകസ്മികമായിക്കിട്ടുന്ന സുഹൃത്തിന്റെ വാക്കുകളിൽ പ്രചോദിതയായി ജീവിതം തിരിച്ചു പിടിക്കുന്നു; 'രാമന്റെ ഏദൻതോട്ട'ത്തിന്റെ കഥ ഇവിടെക്കഴിഞ്ഞു. ഈയൊരു കഥ പറയാനായാണ് രഞ്ജിത്ത് ശങ്കർ കുഞ്ചാക്കോ ബോബനെയും നായിക അനു സിത്താരയേയും ഒപ്പമൊരു കൂട്ടിന് രമേഷ് പിഷാരടിയേയുമൊക്കെ കാട്ടിലും പിന്നവിടുത്തെ ഏറുമാടത്തിലും മരത്തിലുമൊക്കെ കേറ്റിയിറക്കിയത്. 'ഡ്രീംസ് ൻ ബിയോണ്ടി'ന്റെ ബാനറിൽ രഞ്ജിത്ത് ശങ്കർ തന്നെയാണ് ചിത്രത്തിനു വേണ്ടി മുതൽ മുടക്കിയിരിക്കുന്നത്.

ആകെത്തുക : 4.25 / 10

• കഥയും കഥാപാത്രങ്ങളും
• സംവിധാനം
• അഭിനയം
• സാങ്കേതികം
• സംഗീതം/നൃത്തം/ആക്ഷന്‍

• 2.00 / 10
• 3.00 / 10
• 6.00 / 10
• 3.00 / 05
• 3.00 / 05

വിരലിലെണ്ണാവുന്ന അഭിനേതാക്കളെ ചിത്രത്തിലുള്ളൂ. കുഞ്ചാക്കോയെയും അനുവിനെയും രമേഷ് പിഷാരടിയേയും കൂടാതെ ചിത്രത്തിലുള്ള ജോജു ജോർജ്ജ്, ശ്രീജിത്ത് രവി, രമേഷ് പിഷാരടി, പിന്നിടയ്ക്ക് അല്പ നേരത്തേക്ക് തല കാണിക്കുന്ന അജു വർഗീസ്, ഇവരേവരും തങ്ങളാലാവും വിധം കഥാപാത്രങ്ങളെ അറിഞ്ഞവതരിപ്പിച്ചിട്ടുണ്ട്. ഈ കഥാപാത്രങ്ങൾക്കൊരു കഥയില്ലാണ്ടു പോയത് ഇവരാരുടെയും തകരാറല്ലല്ലോ! ദോഷം പറയരുത്; രമേഷ് പിഷാരടിയും അജുവും ചേർന്ന് കുറച്ചു ചിരിക്കാനുള്ള വക ഉള്ള സമയത്ത് ഒപ്പിച്ചിട്ടുണ്ട്. എന്തു വിശേഷം; ഒരു നാരങ്ങാമുറികൊണ്ട് ഒരു ലിറ്റർ നാരങ്ങാവെള്ളമുണ്ടാക്കാൻ നോക്കിയാൽ അതെങ്ങനെയുണ്ടാവും?

മധു നീലകണ്ഠന്റെ ക്യാമറ, സാജന്റെ എഡിറ്റിംഗ്, ബിജിബാലിന്റെ സംഗീതം, ശ്രെയ പാടിയ പാട്ട് ഇവയൊക്കെ ചേരുമ്പോളൊരു ആനച്ചന്തമൊക്കെ ചിത്രത്തിനുണ്ട്. പക്ഷെ, അതുകൊണ്ടെന്താകാൻ! ഇതൊക്കെ ചേരുന്ന സിനിമ ഒരിടത്തും കാണികളിൽ താത്പര്യമുണർത്തുന്നില്ല എന്നതാണ് സങ്കടകരം.

സ്ത്രീ ശാക്തീകരണമായിരുന്നു സംവിധായകൻ പറയാനുദ്ദേശിച്ച വിഷയമെങ്കിൽ അതിതിലും ഭംഗിയായി എങ്ങനെയൊക്കെ പറയാമായിരുന്നു. ഇനിയിപ്പോ ഇത്രയുമേ പറയാനുള്ളൂവെങ്കിൽ ഒരു ഹൃസ്വചിത്രമായോ മറ്റോ ആലോചിക്കുകയായിരുന്നു ഭേദം. അതിനപ്പുറമൊരു മുഴുനീള ചലച്ചിത്രത്തിനുള്ള വകയൊന്നും ഏദൻതോട്ടത്തിന്റെ കഥയിലില്ല തന്നെ. മക്കൾക്ക് വേണ്ടി പിരിയാണ്ട് തെറ്റായൊരു ജീവിത മാതൃക കാട്ടുകയല്ല, മറിച്ച് പിരിഞ്ഞിട്ടായാലും ശരിയായ രണ്ട് മാതൃകകൾ കാട്ടുകയാണ് വേണ്ടതെന്നൊരാശയം ചിത്രത്തിനൊടുവിൽ കൊണ്ടുവന്നത് ഒരിത്തിരി ആശ്വാസം നൽകുന്നുണ്ട്. എന്നാലപ്പോളും സ്നേഹിച്ചൊരാളെ അകലത്തു നിർത്തുക തന്നെയാണ് ആ മാതൃകയുടെ മറ്റൊരു വശമെന്നും ചിത്രം പറഞ്ഞുവെയ്ക്കുന്നു.

'Ramante Edanthottam' deals with a relevant topic but hardly engages the viewers and ends up as a totally boring affair!

കഥയുടെ സൂചനയ്ക്കപ്പുറം പ്രസക്തമായ ഭാഗങ്ങളിൽ സിനിമാവിശേഷത്തിൽ വരരുതെന്ന നിർബന്ധമുണ്ടെങ്കിലും ആമുഖമായൊരു വരി എഴുതിയാൽ തീരുന്ന കഥയേ സിനിമയ്ക്ക് പറയാനുള്ളൂവെങ്കിൽ പിന്നെന്ത് ചെയ്യാൻ! എന്തായാലും അതുകൊണ്ട് സിനിമയുടെ ആസ്വാദ്യത ഏതെങ്കിലും തരത്തിൽ കുറയുമെന്ന പേടി ഇനിയും കാണാൻ താത്പര്യമുള്ളവർക്ക് ഉണ്ടാവേണ്ടതില്ല. കാരണം, അതറിയുന്നതും അറിയാത്തതുമൊന്നും സിനിമയുടെ (ഇല്ലാത്ത) ആസ്വാദ്യതയെ ബാധിക്കുന്നില്ല. അതിനാൽ സിനിമയുടെ കഥ പറഞ്ഞു പോയതിന്റെ പേരിലാരും കെറുവിക്കേണ്ടതില്ല.

Cast & Crew

Cast

Kunchacko Boban, Anu Sithara, Ramesh Pisharody, Joju George, Sreejith Ravi, Muthumani, Aju Varghese etc.

Crew

Directed by Ranjith Sankar

Produced by Ranjith Sankar

Story, Screenplay, Dialogues by Ranjith Sankar

Cinematography by Madhu Neelakantan

Film Editing by V. Sajan

Background Score / Music by Bijibal

Art Direction by Ajay Mangad

Costume Design by Arun Manohar

Makeup by Sreejith Guruvayoor

Lyrics by Santhosh Varma

Stunts by Mafia Sasi

Choreography by Madhu Neelakandan

Stills by Sinat Savier

Designs by Antony Stephen

Banner: Dreams N' Beyond

Released on: 2017 May 12