തിര (Review: Thira)

തിര: തിരച്ചിലും തിരുത്തലും!

ഹരീ, ചിത്രവിശേഷം

രണ്ടുരണ്ടരമണിക്കൂര്‍ നേരം കാണികള്‍ക്ക് കണ്ടുരസിക്കുവാന്‍ പാകത്തിന് പരുവപ്പെടുത്തിയ ചിത്രങ്ങള്‍ എന്നതിനപ്പുറത്തേക്ക് വിനീത് ശ്രീനിവാസന്റെ ആദ്യ രണ്ടു ചിത്രങ്ങളും പോവുന്നില്ല. പ്രസ്തുത ചിത്രങ്ങള്‍ക്കു കാണികള്‍ നല്‍കിയ സ്വീകാര്യത കണക്കിലെടുത്താല്‍, അദ്ദേഹത്തിന്റെ നീക്കം പാളിയില്ലെന്നും പറയാം. പ്രസ്തുത ചിത്രങ്ങള്‍ നല്‍കിയ ആത്മവിശ്വാസം കൈമുതലാക്കി, കൂടുതല്‍ ഗൌരവമുള്ള വിഷയങ്ങളിലേക്ക് വിനീത് ചുവടുമാറുന്നതിന്റെ സൂചനയാണ് 'തിര' നല്‍കുന്നത്. ശോഭനയും ധ്യാന്‍ ശ്രീനിവാസനും പ്രധാന വേഷങ്ങളിലെത്തുന്ന 'തിര'; റീത്സ് മാജിക് പ്രൊഡക്ഷന്‍സിന്റെ ബാനറില്‍ മനോജ് മേനോന്‍ നിര്‍മ്മിച്ചിരിക്കുന്നു. ഉദ്വേഗം നിറയുന്നൊരു അന്വേഷണ യാത്ര, ഒപ്പം ശോഭനയുടെ മികച്ചൊരു കഥാപാത്രവും - 'തിര'യെ കാണുവാന്‍ പരുവപ്പെടുത്തുന്നത് ഇതു രണ്ടുമാണ്.

ആകെത്തുക : 6.00 / 10

കഥയും കഥാപാത്രങ്ങളും
സംവിധാനം
അഭിനയം
സാങ്കേതികം
പാട്ട് / നൃത്തം / ആക്ഷന്‍

: 5.00 / 10
: 6.00 / 10
: 7.00 / 10
: 3.00 / 05
: 3.00 / 05

Snippet Review

'Thira', a splendid wave of thrilling adventure at times while strokes of some stinking realities makes it worth a watch!

വ്യത്യസ്ത സാഹചര്യങ്ങളില്‍ അപഹരിക്കപ്പെട്ട പെണ്‍കുട്ടികളെ തേടിയുള്ള യാത്രയില്‍ രോഹിണിയും (ശോഭന) നവീനും (ധ്യാന്‍) കണ്ടുമുട്ടുന്നു. തുടര്‍ന്നിരുവരും ചേര്‍ന്നു നടത്തുന്ന അന്വേഷണമാണ് 'തിര'യുടെ കാതല്‍. മനുഷ്യക്കടത്തിനെ ആധാരമാക്കി പോയ വര്‍ഷങ്ങളില്‍ പുറത്തിറങ്ങിയ 'ടേക്കണ്‍', 'ട്രേഡ്' തുടങ്ങിയ ചിത്രങ്ങളോട് അവതരണത്തിലും പ്രമേയത്തിലും 'തിര' ചേര്‍ന്നു നില്‍ക്കുന്നു. ഒപ്പം, ഇന്ത്യന്‍ സാഹചര്യങ്ങളോട് ഇണങ്ങുന്ന രീതിയിലേക്ക് കഥ മാറ്റിയെഴുതുവാന്‍ രാകേഷ് മാന്തൊടിക്കു കഴിഞ്ഞിട്ടുണ്ട് എന്നയിടത്ത് 'തിര' വ്യത്യസ്തവുമാവുന്നു. അനുരാധ കൊയ്‌രാള, സുനിത കൃഷ്ണന്‍ തുടങ്ങിയ ചില മനുഷ്യാവകാശ പ്രവര്‍ത്തകരുടെ ജീവിതവും ചിത്രത്തിനു പ്രചോദനമായിട്ടുണ്ടെന്ന തുടക്കത്തിലെ സാക്ഷ്യപ്പെടുത്തല്‍ വെറും വാക്കല്ല, കുറച്ചെങ്കിലും ഗൃഹപാഠം ഈ വിഷയത്തില്‍ രാകേഷും വിനീതും നടത്തിയിട്ടുണ്ടെന്നാണ് ചിത്രം കണ്ടിരുന്നപ്പോള്‍ മനസിലായത്. പോരായ്മകളും യുക്തിഭംഗങ്ങളുമൊക്കെ കുറേയുണ്ടെങ്കിലും, അതൊക്കെ ഒരു പരിധിവരെ വിട്ടു കളയുവാന്‍ പ്രേരിപ്പിക്കുന്ന തരത്തില്‍ വിനീതിന് ചിത്രം പൂര്‍ത്തിയാക്കുവാന്‍ കഴിഞ്ഞതും 'തിര'യുടെ വിജയത്തിനു ഹേതുവാണ്.

Cast & Crew
Thira

Directed by
Vineeth Sreenivasan

Produced by
Manoj Menon

Story, Screenplay, Dialogues by
Rakesh Mantodi / Rakesh Mantodi, Vineeth Sreenivasan

Starring
Shobana, Dhyan Sreenivasan, Deepak Parambol, Gaurav Vasudev, Sijoy Varghese etc.

Cinematography (Camera) by
Jomon T. John

Editing by
Ranjan Abraham

Production Design (Art) by
Ajay Mangad

Music / Background Score by
Shaan Rahman

Sound Design by
Anoop Thilak, Arun Varma

Lyrics by
Anu Elizabeth Jose

Make-up by
Hassan Vandoor

Costumes by
Sameera Saneesh

Thrills by
Dhilip Subbarayan

Stills, Designs by
Arun Chandu

Banner
Reelsmagic Productions

Release Date
2013 Nov 14

രണ്ടേ രണ്ടു കഥാപാത്രങ്ങള്‍, അവരിലൂടെയാണ് ഏതാണ്ട് മുഴുവന്‍ സമയവും കഥ നീങ്ങുന്നത്. അധികം മുഷിപ്പിക്കാതെ ഈ രണ്ടു പേരിലൂടെ സിനിമ കൊണ്ടുപോവുന്നതില്‍ വിനീതിന്റെ മിടുക്ക് പ്രകടമാണ്. ലക്ഷ്യബോധവും കരുത്തുമുള്ള കഥാപാത്രമായ ഡോ. രോഹിണി പ്രണബ് എന്ന മനുഷ്യാവകാശ പ്രവര്‍ത്തകയെ ശോഭന ഉള്‍ക്കൊണ്ടുതന്നെ അവതരിപ്പിച്ചിട്ടുണ്ട്. തുടക്കമെന്ന നിലയില്‍ ധ്യാനിന്റെ നവീനും മോശമായില്ല. ഇവരിരുവരുടേയും അന്വേഷണ യാത്രയില്‍ സഹായികളാകുന്നവര്‍, മനുഷ്യക്കടത്തുകാര്‍ പിന്നെ ഇരകളായ പെണ്‍‌കുട്ടികള്‍ - ഇതര കഥാപാത്രങ്ങളായെത്തുന്ന ഇവരെയൊന്നും അവതരിപ്പിക്കുന്നത് സ്ഥിരം കണ്ടുവരുന്ന അഭിനേതാക്കളല്ലാത്തതിന്റെ നവത്വവും ചിത്രത്തിനുണ്ട്. (സിനിമയ്ക്കൊരു കാസ്റ്റിംഗ് ഡയറക്ടറും ഉണ്ട്, ദിനേഷ് നായര്‍ - നല്ല കാര്യം.)

തന്റെ സ്വാഭാവിക ശൈലിയില്‍ നിന്നുമൊരു മാറ്റം കൊണ്ടുവരുവാനുള്ള മനഃപൂര്‍വ്വമായ ശ്രമത്തിന്റെ ഫലമാണോ എന്നറിയില്ല - ജോമോന്‍ ടി. ജോണിന്റെ ക്യാമറ ആദ്യാവസാനം വെറുതേ ചലിച്ചുകൊണ്ടിരുന്നു. ചിത്രത്തിന്റെ സ്വഭാവം ചിലയിടങ്ങളിലെങ്കിലും ഈയൊരു ദൃശ്യപരിചരണം ആവശ്യപ്പെടുന്നെങ്കിലും, അമിതമായ ഉപയോഗം അതിന്റെ ശക്തി ചോര്‍ത്തുമെന്ന് ജോമോന്‍ തിരിച്ചറിയേണ്ടിയിരുന്നു. കഥാപരിസരങ്ങളും കഥാപാത്രങ്ങളും കഥയ്ക്കു ചേരുന്ന രീതിയില്‍ പരുവപ്പെടുത്തുവാനും അണിയറപ്രവര്‍ത്തകര്‍ക്കു കഴിഞ്ഞു. സിനിമയ്ക്കുതകുന്ന പശ്ചാത്തല സംഗീതവുമായി ഷാന്‍ റഹ്മാനും സാന്നിധ്യമറിയിക്കുന്നു. ഗാനങ്ങള്‍ക്ക് പ്രാധാന്യം വരുന്നൊരു പ്രമേയമല്ല സിനിമ കൈകാര്യം ചെയ്യുന്നത് എന്നതിനാല്‍ തന്നെ അവ ഏറെ മികവൊന്നും പുലര്‍ത്തുന്നില്ല എന്നതൊരു കുറവായി കാണുന്നില്ല.

രണ്ടു പേര്‍ നടത്തുന്ന തിരച്ചിലിന്റെ കഥ പറയുന്ന ത്രില്ലര്‍ എന്നതിനപ്പുറം 'തിര' പ്രസക്തമാവുന്നത് ചില അപ്രിയ സത്യങ്ങളുടെ നേര്‍ക്കാഴ്ചയായി അതു മാറുന്നയിടത്താണ്. ഒരു സാമൂഹിക ജീവി എന്ന നിലയില്‍ ചില തിരുത്തലുകള്‍ നമ്മുടെ ഓരോരുത്തരുടേയും കാഴ്ചപ്പാടിലും ജീവിതത്തിലും വരുത്തേണ്ടതുണ്ട് എന്നു ചിത്രം ഓര്‍മ്മിപ്പിക്കുന്നു. കഥ നടക്കുന്നത് കര്‍ണാടകത്തിലാണെങ്കിലും ഇത് എവിടെയും സംഭവിക്കാവുന്ന ഒന്നാണെന്ന് സംവിധായകന്‍ തുടക്കത്തിലേ പറഞ്ഞുവെയ്ക്കുന്നുണ്ട്. അതാണതിന്റെ ശരിയും. ഒരു കൊച്ചുകുട്ടി തന്റെ രക്ഷകയായ രോഹിണി മയിയെക്കുറിച്ച് അതിശയോക്തി കലര്‍ന്ന രീതിയില്‍ പറഞ്ഞു തുടങ്ങുന്നയിടത്താണ് സിനിമ ആരംഭിക്കുന്നത്. അവസാനിക്കുന്നതാവട്ടെ, സ്വന്തം കാര്യം വരുമ്പോളല്ലാതെ ഒരല്പം കരുതല്‍ സഹജീവികളോടും കാണിക്കുവാന്‍ കഴിയുന്ന ഏതൊരാള്‍ക്കും ചെയ്യാവുന്നതേ മയിയും ചെയ്യുന്നുള്ളൂ എന്ന നവീന്റെ തിരിച്ചറിവിലൂടെയാണ്. മുഷിപ്പിക്കാത്തൊരു ത്രില്ലര്‍ എന്നതിലുപരി ചിത്രത്തിന്റെ ഈയൊരു നന്മയാണ് 'തിര'യിലൊന്ന് കാല്‍ നനയ്ക്കാമെന്ന് പറയുവാന്‍ പ്രേരണയാവുന്നതും!

വീണ്ടുവിചാരം: ഒത്താലൊത്തു എന്ന മട്ടിലാണ് രോഹിണിയുടേയും നവീന്റെയും നീക്കങ്ങള്‍ പലപ്പോഴും. ചില കാര്യങ്ങളെങ്കിലും സാമാന്യ യുക്തിയെ വെല്ലുവിളിക്കുകയും ചെയ്യും - 'തിര' സവിശേഷമായൊരു ത്രില്ലറൊന്നുമല്ല എന്നെടുത്തു പറയട്ടെ. അതിനപ്പുറം ചിത്രത്തോട് ഇഷ്ടം തോന്നുന്ന മറ്റു ചിലതുണ്ടെന്നതാണ് പ്രസക്തമായ കാര്യം.