നീലാകാശം പച്ചക്കടൽ ചുവന്ന ഭൂമി (Review: Neelakasham Pachakadal Chuvanna Bhoomi)

നീലാകാശം പച്ചക്കടൽ ചുവന്ന ഭൂമി: തിരിച്ചറിവുകളുടെ യാത്രകൾ!

ഹരീ, ചിത്രവിശേഷം

മോട്ടോർ സൈക്കിളിൽ കേരളത്തിൽ നിന്നും നാഗാലാൻഡ് വരെ യാത്രചെയ്യുന്ന രണ്ടു സുഹൃത്തുക്കൾ - കാസിയും സുനിയും. തുടക്കത്തിൽ നിർവ്വചിക്കപ്പെടാത്ത ഇവരുടെ ലക്ഷ്യം യാത്രയ്ക്കൊപ്പം പതിയെപ്പതിയെ വ്യക്തമാവുന്നു. 'ചാപ്പാ കുരിശി'ലൂടെ സംവിധായകനായി തുടക്കമിട്ട സമീർ താഹിർ ആദ്യചിത്രത്തിൽ നിന്നും ദൂരമേറെ താണ്ടുന്നുണ്ട് 'നീലാകാശം പച്ചക്കടൽ ചുവന്ന ഭൂമി'യെന്ന ഈ സഞ്ചാരചിത്രത്തിലെത്തുമ്പോൾ. സംഭാഷണങ്ങളെ മാത്രം കൂട്ടുപിടിച്ച് കഥപറയുന്ന മലയാളസിനിമയുടെ പതിവുശീലത്തിൽ നിന്നും മാറി നടക്കുവാൻ രചയിതാവായ ഹാഷിർ മുഹമ്മദും ശ്രദ്ധ നൽകിയിട്ടുണ്ട്. ദുൽക്കർ സൽമാനും സണ്ണിവെയ്നും യാത്രികരായ പ്രധാന കഥാപാത്രങ്ങളെ അവതരിപ്പിക്കുന്ന ഈ ചിത്രം ഹാപ്പി അവേഴ്സ് എന്റർടൈന്മെന്റിന്റെയും ഇ4 എന്റർടൈന്മെന്റിന്റെയും സംയുക്ത ബാനറിൽ സമീർ താഹിർ നിർമ്മിച്ചിരിക്കുന്നു.

ആകെത്തുക : 7.00 / 10

കഥയും കഥാപാത്രങ്ങളും
സംവിധാനം
അഭിനയം
സാങ്കേതികം
പാട്ട് / നൃത്തം / ആക്ഷന്‍

: 5.00 / 10
: 7.00 / 10
: 8.00 / 10
: 4.00 / 05
: 4.00 / 05

Snippet Review

First of it's kind in Malayalam and the boys did it well. It could have been better, though!

ഒരു ദേശത്തിന്റെ അതത് കാലത്തെ രാഷ്ട്രീയസാമൂഹികസാംസ്കാരിക പരിസരങ്ങളെ പ്രതിഫലിപ്പിക്കുന്നവയാണ് അല്ലെങ്കിൽ അതിനുതകുന്നവയാണ് സഞ്ചാരചിത്രങ്ങൾ. 'നീ.പ.ചു.ഭൂ'യെ സംബന്ധിച്ചിടത്തോളം സഞ്ചാരചിത്രത്തിന്റെ ഈ രീതിയിലുള്ള സാധ്യതകൾ എത്രകണ്ട് ഉപയോഗപ്പെടുത്തി എന്നു സംശയിക്കാം. വിശേഷിച്ചും, ഗുവേരയെന്ന യുവാവിനെ ചെ-യെന്ന വിപ്ലവനേതാവാക്കിയ 'മോട്ടോർ സൈക്കിൾ ഡയറീസാ'ണ് ഈ സിനിമയുടെയൊരു പൂർവ്വമാതൃക എന്നുകൂടി വരുമ്പോൾ! (അതിന്റെയൊരു അനുകരണമാണിത് എന്നല്ല ഈ പറഞ്ഞതിനർത്ഥം, ആ ചിത്രമാണ് സമീർ താഹിറിനും ഹാഷിർ മുഹമ്മദിനും പ്രചോദനമെന്ന് കരുതാമെന്നുദ്ദേശം.) പൂർണ അർത്ഥത്തിലൊരു 'റോഡ് മൂവി' മലയാളത്തിനു നൽകുവാൻ സമീർ താഹിറും കൂട്ടരും കാട്ടിയ ആത്മാർത്ഥത ഈയൊരു കുറവിനെ ഒരു പരിധിവരെ മയപ്പെടുത്തുന്നു എന്നതാണിവിടെ പ്രസക്തം.

Cast & Crew
Neelakasham Pachakadal Chuvanna Bhoomi

Directed by
Sameer Thahir

Produced by
Sameer Thahir

Story, Screenplay, Dialogues by
Hashir Mohamed

Starring
Dulquer Salmaan, Sunny Wayne, Surja Bala Hijam, Ena Saha, Dhritiman Chatterjee, Joy Mathew, Paloma Monnappa, Pearle Maaney, Avantika, KTC Abdullah, Vanitha Krishnachandran, Ajay Nataraj, Madhubaladevi, Bobby Zachariah Abraham etc.

Cinematography (Camera) by
Girish Gangadharan

Editing by
Sreekar Prasad

Production Design (Art) by
Diljith

Music by
Rex Vijayan

Sound Design by
Tapas Nayak

Make-up by
Ronex

Costumes by
Mashar Hamsa

Thrills by
Mafia Sasi

Stills by
Vishnu Thandassery

Designs by
Thought Station

Banner
Happy Hours Entertainments, E4 Entertainment

Release Date
2013 Aug 09

ദുൽക്കർ സൽമാനും സണ്ണി വെയ്നും കാസി, സുനി എന്നീ കഥാപാത്രങ്ങൾക്ക് നന്നായിണങ്ങുന്നു. വിശ്വസനീയമായ രീതിയിൽ ഇരുകഥാപാത്രങ്ങളേയും അനായസതയോടെ അവതരിപ്പിക്കുവാൻ ഇവരിരുവർക്കുമായി. ധൃതിമാൻ ചാറ്റർജി, സുർജ ബാല ഹിജാം, പലോമ മൊന്നപ്പ, ഇന സാഹ - താരങ്ങളെ നിറയ്ക്കുക എന്നതിനപ്പുറം സിനിമയ്ക്കാവശ്യമുള്ള അഭിനേതാക്കളുടെ തിരഞ്ഞെടുപ്പിന്റെ ഭാഗമായാണ് അന്യഭാഷാ നടീനടന്മാരായ ഇവരൊക്കെയും സിനിമയുടെ ഭാഗമാവുന്നത്. ഇതൊന്നുകൊണ്ടു തന്നെ സിനിമയ്ക്ക് മറ്റൊരു രീതിയും ഭാവവും കൈവരുന്നുണ്ട്. ജോയ് മാത്യു, വനിത കൃഷ്ണചന്ദ്രൻ, അവന്തിക എന്നിങ്ങനെ മറ്റു ചില അഭിനേതാക്കളും സിനിമയിൽ ചില പ്രസക്തവേഷങ്ങളിലെത്തുന്നു.

കാസിയുടേയും സുനിയുടേയും ബൈക്കുകൾക്കൊപ്പം നീങ്ങുന്ന ക്യാമറ കാണിച്ചുതരുന്ന ഭൂവിടങ്ങളും പരിചിതദൃശ്യങ്ങളിൽ നിന്നുമൊരു മാറ്റമാണ്. അവയുടെ ചിത്രീകരണവും ചിത്രപരിചരണവും നന്ന്. ഗിരീഷ് ഗംഗാധരനും ശ്രീകർ പ്രസാദുമാണ് ഛായാഗ്രഹണവും ചിത്രസന്നിവേശവും. തപസ് നായികിന്റെ ശബ്ദ സംവിധാനത്തിൽ റെക്സ് വിജയന്റെ സംഗീതവും കൂടി ചേരുന്ന ഒരു റോഡ് മൂവിയിൽ നിന്നും പശ്ചാത്തലസംഗീതത്തിന്റെ കാര്യത്തിലും ഗാനങ്ങളുടെ കാര്യത്തിലും വേറിട്ടൊരു അനുഭവം പ്രതീക്ഷിക്കുന്നവർ നിരാശപ്പെടേണ്ടി വരും. ദിൽജിത്ത്, റോണെക്സ്, മഷർ ഹംസ തുടങ്ങിയവരുടെ കല, ചമയം, വസ്ത്രാലങ്കാരം എന്നിവയിലെ ശ്രമങ്ങളും സിനിമയോട് ചേർന്നു പോവുന്നു.

'നീലാകാശം പച്ചക്കടൽ ചുവന്ന ഭൂമി'യെന്ന പേര് വിശാലമായൊരു ലോകം കാണിച്ചു തരുന്നൊരു സിനിമയ്ക്ക് ചേരുന്നതാണ്. ആ ഒരു വിശാലതയാണ് പ്രേക്ഷകരെ സംബന്ധിച്ചിടത്തോളം സിനിമയിൽ നിന്നും ലഭിക്കാത്തത്. തന്റെ പ്രണയിനിയെ തേടിയുള്ള കാസിയുടെ യാത്ര എന്നതിനപ്പുറം ഈ സിനിമയെ എന്തെങ്കിലുമൊക്കെ ആക്കണമെന്ന് രചയിതാവിനും സംവിധായകനും ആഗ്രഹമുണ്ടെന്ന് വ്യക്തം. ആദ്യം പുരിയിലും, പിന്നീട് ഒളിവിൽ കഴിയുന്നൊരു മലയാളിയുടെ വർക്ക്ഷോപ്പിലും, തുടർന്ന് വഴിതെറ്റിയെത്തുന്ന ബംഗാളിലെയൊരു ഗ്രാമത്തിലും, ഒടുവിലായി കലാപത്തിന്റെ കെടുതികൾ പേറുന്നൊരു ആസാമീസ് തെരുവിലുമൊക്കെ കാസിയും സുനിയും കാണുന്ന കാഴ്ചകളിലൂടെ എന്തൊക്കെയോ പറയുവാൻ ശ്രമമുണ്ട്. അതെന്താണെന്നതാണ് സിനിമ തീരുമ്പോഴും തുടരുന്ന സസ്പെൻസ്. ഒരു പക്ഷെ, സിനിമ എന്താവണം പ്രേക്ഷകരിൽ ബാക്കിയാക്കേണ്ടത് എന്നതിനെക്കുറിച്ചൊരു ധാരണക്കുറവാകാം ഇതിങ്ങനെയാകുവാനൊരു കാരണം.

കേരളത്തിൽ നിന്നും നാഗാലാൻഡ് വരെയുള്ള ബൈക്ക് യാത്ര ഇത്രകണ്ട് സുഗമമാവുമോ എന്ന സംശയവും ഇടയ്ക്കൊക്കെ തോന്നി. സ്വന്തം ഭൂമിയിൽ നിന്നും നിഷ്കാസിതരായി, ബുള്ളറ്റിൽ വരുന്ന പോലീസിനേയും നക്സലുകളേയും ഭയന്നു ജീവിക്കുന്നവർക്ക് സുനിയും കാസിയും ചേർന്നുണ്ടാക്കി നൽകുന്നത്, അരിപൊടിക്കുവാനുള്ള യന്ത്രം! ഒരർത്ഥത്തിൽ ഇതെത്ര ബാലിശമാണ്. മലയാളത്തിലിതാദ്യം എന്നു പറയാവുന്നൊരു സഞ്ചാരസിനിമ, അതു ചെയ്തിരിക്കുന്നതിൽ അനുഭവപ്പെടുന്ന ആത്മാർത്ഥത, അഭിനേതാക്കളുടേയും സാങ്കേതിക വിദഗ്ദ്ധരുടേയും നല്ല ശ്രമങ്ങൾ; ഇവയൊക്കെയാണ് ഈ ചിത്രത്തെ കണ്ടിരിക്കുവാൻ പ്രേരിപ്പിക്കുന്ന ഘടകങ്ങളാണ്. 'കണ്മുന്നിൽ കത്തണ സിനിമ'യായില്ലല്ലോ എന്ന നഷ്ടബോധം ബാക്കിയാവുമ്പോഴും, ഒരു പക്ഷേ അത്തരം ചിത്രങ്ങൾക്കൊരു പ്രേരകശക്തിയാകുവാൻ ഈ ചിത്രത്തിനാവുമെന്ന ചെറുതല്ലാത്ത പ്രതീക്ഷയും ചിത്രം നൽകുന്നുണ്ട്.

ഓഫ് ടോപ്പിക്ക്: കഥാപാത്രങ്ങൾ അന്യഭാഷകളിൽ സംസാരിക്കുമ്പോൾ ചുവടെ വന്ന സബ്ടൈറ്റിലുകളിലെ അക്ഷരപ്പിശകുകൾ ഒഴിവാക്കേണ്ടിയിരുന്നു. കമ്പനിക്ക് കംബനി എന്നൊക്കെ എഴുതിക്കണ്ടത് വല്ലാതെ അരോചകമായി!