ലേഡീസ് & ജെന്റില്‍മാന്‍ (Review: Ladies & Gentleman)

ലേഡീസ് & ജെന്റില്‍മാന്‍ : വിഷുക്കണിയല്ലിത്, വിഷുക്കെണി!

ഹരീ, ചിത്രവിശേഷം

പലഭാഷകളിലിറങ്ങി എല്ലായിടവും ബോക്സ് ഓഫീസില്‍ വിജയം കണ്ട 'ബോഡിഗാര്‍ഡി'നു ശേഷം സിദ്ധിക്ക് സംവിധാനം ചെയ്യുന്ന ചിത്രം എന്നതിനാല്‍ തന്നെ 'ലേഡീസ് & ജെന്റില്‍മാന്‍' ഏറെ ശ്രദ്ധ നേടുന്നു. ഇതിനോടൊപ്പം, സ്വതന്ത്ര സംവിധായകനായതിന് ശേഷം മോഹന്‍ലാലിനെ നായകനാക്കി സിദ്ധിക്ക് ഒരുക്കുന്ന ആദ്യ ചിത്രം എന്നതു കൂടിയാവുമ്പോള്‍ പ്രേക്ഷകരുടെ പ്രതീക്ഷകളും വാനോളമെത്തുന്നു. എന്നാലെന്തു ചെയ്യാം, വിഷുക്കണിയായി തിയേറ്ററിലെത്തിയ ചിത്രം പ്രേക്ഷകര്‍ക്കൊരു വിഷു'ക്കെ'ണിയായി മാറുന്നു എന്നതാണ് പച്ച പരമാര്‍ത്ഥം. ഇത്രയും കാലത്തെ പരിചയവും അനുഭവസമ്പത്തുമുള്ള സിദ്ധിക്കിനെ പോലൊരു സംവിധായകന് പ്രേക്ഷകര്‍ക്ക് നല്‍കുവാനായത് ഇമ്മാതിരിയൊരു കൊപ്പരാട്ടി സാധനമാണല്ലോ എന്നോര്‍ക്കുമ്പോള്‍ അദ്ദേഹത്തോട് സഹതാപവുമുണ്ട്. ആശീര്‍വാദ് സിനിമാസിന്റെയും കോണ്‍ഫിഡന്‍റ് എന്റര്‍ടൈന്‍മെന്‍റിന്റെയും ബാനറില്‍ ആന്റണി പെരുമ്പാവൂരും ഡോ. റോയ് സി.ജെ.-യും ചേര്‍ന്നാണ് ഈ പടത്തിനു വേണ്ടി കാശിറക്കിയിരിക്കുന്നത്. ('കാസനോവ'യ്ക്കുവേണ്ടി ഇവരിരുവരും ചേര്‍ന്നു പൊടിച്ചത്രയും വരില്ല, എങ്കിലും ചിലവ് ഒട്ടും കുറവല്ല!)ചിത്രത്തിലെ ജെന്റില്‍മാനായി മോഹന്‍ലാലെങ്കില്‍, മീര ജാസ്മിനും മംമ്ത മോഹന്‍ദാസും പത്മപ്രിയയും മിത്ര കുര്യനുമൊക്കെയാണിതിലെ ലേഡീസ്.

ആകെത്തുക : 2.00 / 10

കഥയും കഥാപാത്രങ്ങളും
സംവിധാനം
അഭിനയം
സാങ്കേതികം
പാട്ട് / നൃത്തം / ആക്ഷന്‍

: 0.50 / 10
: 0.50 / 10
: 3.00 / 10
: 2.50 / 05
: 1.50 / 05

Snippet Review

It is a real pity that a director like Siddique and an actor like Mohanlal could only offer this crap for this year's Vishu.

എന്തിനും ഏതിനും ഏഴു ദിവസത്തില്‍ പരിഹാരം കാണുന്നൊരു ജെന്റില്‍മാനും അയാളില്ലാതെയൊരു ജീവിതമില്ലേയെന്ന് കരുതി നടക്കുന്ന കുറേപ്പേരും (അതില്‍ പ്രധാനികള്‍ ലേഡീസാണെന്ന് പ്രത്യേകം പറയേണ്ടല്ലോ!). പിന്നെയയാളുടെ തത്വചിന്ത ക്ലാസുകളായി, ജീവിത വീക്ഷണങ്ങളായി, ജെന്റില്‍മാന്റെ വാക്കുകൊടുക്കലുകളായി... ഇടവേളയോടടുപ്പിച്ചും പിന്നെ ചിത്രത്തിനോടുവിലും പൊളിക്കുന്ന രണ്ടു സസ്പെന്‍സുകളുണ്ട് (അങ്ങിനെ വിളിക്കാമോ എന്തോ!) ചിത്രത്തില്‍ - കണ്ടാലാരും തകര്‍ന്നു പോവും. ഈ പറഞ്ഞവയെല്ലാം തികച്ചും ബാലിശമായാണ് അവതരിപ്പിച്ചിരിക്കുന്നത് എന്നു കൂടിയുണ്ട്. ചിത്രത്തിലിടയ്ക്കിടെ വരുന്ന ചില നേരമ്പോക്കുകള്‍, കലാഭവന്‍ ഷാജോണിന്റെ വക, അതുമാത്രമാണ് ചിത്രത്തിലെ ഏക ആശ്വാസം. ഇത്രയും വികലമായൊരു തിരക്കഥയെഴുതുകയും അതെടുത്ത് തികച്ചും അപക്വമായി സംവിധാനിച്ചൊരു സിനിമയാക്കുകയും ചെയ്ത സിദ്ധിക്കിന് തന്നെ കൊടുക്കണം, മലയാളത്തില്‍ സംവിധായകര്‍ക്ക് കൊടുക്കുന്ന ഏറ്റവും വലിയ പ്രതിഫലം!

Cast & Crew
Ladies & Gentleman

Directed by
Siddique

Produced by
Antony Perumbavoor, Dr. Roy C.J.

Story, Screenplay, Dialogues by
Siddique

Starring
Mohanlal, Mamta Mohandas, Kalabhavan Shajon, Padmapriya, Mithra Kurian, Meera Jasmine, Krish. J. Sathaar, Manoj K. Jayan, Krishnakumar, K.B. Ganesh Kumar, Sivaji Guruvayoor, Sreelatha Namboothiri etc.

Cinematography (Camera) by
Satheesh Kurup

Editing by
K.R.Gowri Shanker

Production Design (Art) by
Mani Suchithra

Music by
Ratheesh Vegha

Lyrics by
Rafeeq Ahmed

Make-up by
P.N. Mani

Costumes by
Sameera Saneesh

Choreography by
Brinda

Thrills by
Palani

Stills by
Shajil Obscura

Designs by
Collins Leophil

Banner
Aashirvad Cinemas, Confident Entertainment

Release Date
2013 April 12

മോഹന്‍ലാല്‍ എന്നൊരു നടനുണ്ടായിരുന്നു മുന്‍പ് മലയാളത്തില്‍, ആ നടന്റെയൊരു രൂപമുണ്ട് ഇതിലെ നായകനായ ബോസിന്. അതിലപ്പുറം അദ്ദേഹത്തിലെ നടനെ ചിത്രത്തില്‍ മഷിയിട്ടു നോക്കിയാല്‍ കാണാന്‍ കിട്ടില്ല! പടമെത്ര മോശമായാലും തന്റെ സാന്നിധ്യമൊന്നുകൊണ്ട് മാത്രം അത് കണ്ടിരിക്കാവുന്ന പരുവത്തിലാക്കുവാന്‍ മോഹന്‍ലാലിന് കഴിഞ്ഞിരുന്നുവെങ്കില്‍, ഇതില്‍ ഏറ്റവും വെറുപ്പിക്കുന്നത് ലാലാണ്. തൊട്ടു പിന്നിലുണ്ട് മീര ജാസ്മിന്‍. ഒരല്പം കിറുക്കുണ്ടോ എന്നു തോന്നും വിധമാണ് മീരയുടെ അഭിനയം പലപ്പോഴും. എന്തിനു വേണ്ടിയെന്നോ ഏതിനു വേണ്ടിയെന്നോ ഒരു പിടിയുമില്ലാതെ ബോസിനു ചുറ്റും കറങ്ങുന്ന കുറേ ലേഡീസായി മംമ്തയും പത്മപ്രിയയും മിത്ര കുര്യനുമൊക്കെയുണ്ട്. കലാഭവന്‍ ഷാജോണിനെ താത്പര്യമുള്ളവര്‍ക്ക് അദ്ദേഹത്തെ മുഴുനീളം കണ്ടിരിക്കാം. വില്ലനാണോ അതോ ഒരു ചിന്ന നായകനാണോ എന്ന സംശയം ബാക്കിവെച്ച് കൃഷ് ജെ. സാത്താറും ചിത്രത്തിലൊരു പ്രസക്ത വേഷം ചെയ്യുന്നു. ശിവാജി ഗുരുവായൂര്‍, കെ.ബി. ഗണേഷ് കുമാര്‍, കൃഷ്ണകുമാര്‍, മനോജ് കെ. ജയന്‍, ശ്രീലത നമ്പൂതിരി തുടങ്ങിയവരൊക്കെയാണ് മറ്റ് വേഷങ്ങളില്‍.

സാങ്കേതികമായി ചിത്രത്തിനൊരു കുറവും പറയാനില്ല, മികവും പറയാനില്ല. ചിത്രത്തിന്റെ പേര് ചുരുക്കിയെഴുതിയാല്‍ കിട്ടുന്ന 'LaG', അത് വേണ്ടുവോളമുണ്ട് ചിത്രത്തില്‍. സതീഷ് കുറുപ്പിന്റെ ക്യാമറ പകര്‍ത്തിയ ദൃശ്യങ്ങളുടെ ഭംഗി ചിത്രത്തിനൊരു പുറം മോടി നല്കുന്നുണ്ട്. ഈ ചിത്രത്തിലെന്ന പോലെ, ഇല്ലാത്ത സന്ദര്‍ഭങ്ങള്‍ക്ക് പാട്ടെഴുതി കൊടുക്കുന്ന റഫീഖ് അഹമ്മദിനെ സമ്മതിക്കണം. അങ്ങിനെയെഴുതി രതീഷ് വേഗ ഈണമിട്ട നാലഞ്ച് പാട്ടുകള്‍ ആല്‍ബത്തില്‍ കാണുണെങ്കിലും ഏതോ രണ്ടെണ്ണമേ ചിത്രത്തില്‍ കണ്ടുള്ളൂ, അത്രയും ഭാഗ്യം! ഇനിയിപ്പോള്‍ അടിപിടിയില്ല എന്നൊരു കുറവ് ആരും പറയണ്ടെന്ന് കരുതിയാവണം രണ്ടിടത്ത് അതുമുണ്ട്, പളനിയുടെ വക.

മലേഷ്യ എയര്‍ലൈന്‍സിലെ എയര്‍ ഹോസ്റ്റസ്, എമിറേറ്റ്സിന്റെ കൊച്ചിയില്‍ നിന്നും അമേരിക്കയ്ക്കുള്ള ഫ്ലൈറ്റില്‍, കിംഗ് ഫിഷര്‍ എയര്‍ ഹോസ്റ്റസുമാരുടെ യൂണിഫോമില്‍, നായകനു പ്രിയപ്പെട്ട ഡ്രിങ്കുമായെത്തുന്ന അത്ഭുത ദൃശ്യം കാണണമെങ്കില്‍ സിദ്ധിക്കിന്റെ ഈ പടം തന്നെ കാണണം! ഇതൊക്കെ ഇത്ര കൃത്യമായി ചേര്‍ത്തുവെയ്ക്കുന്ന സംവിധായകന് എത്ര കോടി കൊടുത്താലാണ് മതിയാവുക! വിതരണാവകാശവും മൊഴിമാറ്റത്തിനുള്ള അവകാശവും ഒക്കെ വിറ്റ് മുടക്കുമുതലിലധികം നേടിക്കഴിഞ്ഞ സ്ഥിതിക്ക് ഇനിയും ഇത്തരം ചിത്രങ്ങള്‍ക്കായി കോടികള്‍ മുടക്കുവാന്‍ നിര്‍മ്മാതാക്കള്‍ മടിക്കില്ലായിരിക്കാം. പക്ഷെ, തങ്ങളെ തങ്ങളാക്കിയ പ്രേക്ഷകരെ മറന്ന്‍, ലേഡീസിനും ജെന്റില്‍മാനും ചേരാത്ത ഇമ്മാതിരി ചിത്രങ്ങളെടുക്കുന്ന സിദ്ധിക്കും അതിനു നിന്നു കൊടുക്കുന്ന മോഹന്‍ലാലും ചെയ്യുന്നത് തീരെ മാന്യമല്ല എന്നു മാത്രം ഓര്‍മ്മപ്പെടുത്തി ഈ വിശേഷം അവസാനിപ്പിക്കുന്നു. ഏവര്‍ക്കും വിഷു ആശംസകള്‍!

ഗുണപാഠം: എല്ലാ സിനിമകളും കരുതിവെയ്ക്കാനുള്ളതല്ല, ചിലതൊക്കെ വേസ്റ്റാണ്. വലിച്ചെറിഞ്ഞു കളഞ്ഞില്ലെങ്കില്‍ അത് നമ്മളേം കൊണ്ടേ പോവൂ! ഇതൊരു കള്ളു കൂടിയന്റെ ജല്‍പനമല്ല... - ഇത്രയും ഓര്‍മ്മയിരിക്കട്ടെ! :-)