സ്പാനിഷ് മസാല (Review: Spanish Masala)

സ്പാനിഷ് മസാല: മസാല സ്പാനിഷെങ്കിലും, രുചി തനി നാടന്‍!

ഹരീ, ചിത്രവിശേഷം

ലാല്‍ ജോസും ദിലീപും ഇതിനു മുന്‍‌പ് ഒന്നിച്ച സിനിമകളുടെ പട്ടിക നോക്കിയാല്‍ ഹിറ്റുകളുമുണ്ട് ഫ്ലോപ്പുകളുമുണ്ട്. ഇരുവരും വീണ്ടുമൊന്നിക്കുന്ന ‘സ്പാനിഷ് മസാല’യെക്കുറിച്ച് അമിതപ്രതീക്ഷയൊന്നും അതുകൊണ്ടുതന്നെ ആര്‍ക്കും ഉണ്ടാ‍യിരുന്നിരിക്കില്ല. ‘ചാന്ത്പൊട്ടി’നു ശേഷം ബെന്നി പി. നായരമ്പലം ലാല്‍‌ജോസിനു വേണ്ടി ഈ ചിത്രത്തില്‍ രചന നിര്‍‌വ്വഹിച്ചിരിക്കുന്നു. ബിഗ് സ്ക്രീന്‍ പ്രൊഡക്ഷന്‍‌സിന്റെ ബാനറില്‍ നൗഷാദാണ് ചിത്രത്തിനുവേണ്ടി പണമിറക്കിയിരിക്കുന്നത്. കുഞ്ചാക്കോ ബോബന്‍, സ്പാനിഷ് അഭിനേത്രി ഡാ‍നിയേല സച്ചേരി, ബിജു മേനോന്‍ തുടങ്ങിയവരാണ് ദിലീപിനൊപ്പം മുഖ്യവേഷങ്ങളില്‍. ഭൂരിഭാഗം ലൊക്കേഷനുകളും സ്പെയിനില്‍, കൂടെ അഭിനയിക്കുവാന്‍ സ്പെയിനില്‍ നിന്നുമുള്ള അഭിനേതാക്കള്, സ്പെയിനിലെ തക്കാളിയേറുത്സവവും കാളപ്പോരുമൊക്കെ മേമ്പൊടിക്ക്; മസാലക്കൂട്ടിലെ ചേരുവകള്‍ക്ക് വ്യത്യസ്തതയുണ്ട്. പക്ഷെ, അതൊക്കെ ചേര്‍ത്ത് ‘സ്പാനിഷ് മസാല’യാക്കി വിളമ്പുമ്പോഴും സാധാരണ മലയാളം പടങ്ങളുടെ നാടന്‍ രുചി തന്നെയാണ്‌ ചിത്രവും നല്‍കുന്നത്!

ആകെത്തുക     : 3.00 / 10

കഥയും കഥാപാത്രങ്ങളും
സംവിധാനം
അഭിനയം
സാങ്കേതികം
പാട്ട് / നൃത്തം / ആക്ഷന്‍

: 1.00 / 10
: 2.00 / 10
: 3.00 / 10
: 3.50 / 05
: 2.50 / 05

പല ഭാഷകളിലുമായി ഒത്തിരിവട്ടം കണ്ടുകഴിഞ്ഞൊരു പഴങ്കഥ തന്നെയാണ് ‘സ്പാനിഷ് മസാല’യാക്കി ബെന്നി പി. നായരമ്പലം ഒരുക്കിയിരിക്കുന്നത്. കാമുകനെ നഷ്ടപ്പെടുന്ന നായിക, സാന്ത്വനവുമായി ഇടയ്ക്കെത്തുന്ന നായകന്‍‍, അയാളുമായി അടുക്കുന്ന നായിക, വിവാഹത്തോടടുക്കുമ്പോള്‍ പഴയ കാമുകന്റെ തിരിച്ചുവരവ്, താരമൂല്യം കൂടിയ ആളുമായുള്ള നായികയുടെ ഒരുമിക്കല്‍; ഈ ചുറ്റിക്കളികളൊക്കെ നാമെത്രവട്ടം കണ്ടുകഴിഞ്ഞതാണ്! ഇതിപ്പോള്‍ സ്പെയിനില്‍ പോയി പറഞ്ഞു എന്നതുകൊണ്ട് പുതുമ വരുമോ? ഇത്രയും നല്ലൊരു പ്രൊഡക്ഷനുവേണ്ടി ഇങ്ങിനെയൊരു പരട്ടക്കഥ എഴുതിയ ബെന്നിയേയും അതെടുത്ത് സിനിമയാക്കാന്‍ തുനിഞ്ഞ ലാല്‍ ജോസിനെയും എന്തുപറഞ്ഞാണ് അഭിനന്ദിക്കേണ്ടത് എന്നേ സംശയമുള്ളൂ! ചര്‍വ്വിതചര്‍വ്വണമാണ് നടത്തുന്നതെന്നതു പോട്ടെന്നു വെച്ചാലും, എടുത്തു പറയാവുന്നൊരു കഥാസന്ദര്‍ഭമോ കഥാപാത്രമോ പോലും ചിത്രം അവശേഷിപ്പിക്കുന്നില്ല എന്നതാണ് ഖേദകരം. തിരക്കഥ ശുഷ്കമാണെങ്കിലും ലാല്‍ ജോസിന്റെ സംവിധാനത്തില്‍ സിനിമ മുഷിപ്പില്ലാതെ കണ്ടിരിക്കുവാന്‍ പാകത്തിലാവുകയാണ്‌ പതിവ്. ഇവിടെ ആ പതിവും തെറ്റുന്നു. അനവസരത്തിലെത്തുന്ന പാട്ടുകളും അവിടെയുമിവിടെയുമൊക്കെ വരുന്ന മിമിക്രി കളികളും ഒക്കെ ചേര്‍ന്ന് കാണികളെ മുഷിപ്പിച്ച് വെറുപ്പിച്ചാണ് ചിത്രം തീര്‍ന്നു കിട്ടുന്നത്.

Cast & Crew
Spanish Masala

Directed by
Lal Jose

Produced by
Noushad

Story, Screenplay, Dialogues by
Benny P. Nayarambalam

Starring
Dileep, Daniela Zacherl, Kunchacko Boban, Biju Menon, Vinaya Prasad, Nelson, Javier, Clements, Kalaranjini, Gopalakrishnan etc.

Cinematography (Camera) by
Lokanathan

Editing by
Ranjan Abraham

Production Design (Art) by
Gokuldas

Music by
Vidyasagar

Sound Effects by
Arun Seenu

Lyrics by
Venugopal R.

Make-Up by
Sreejith Guruvayoor

Costumes by
Sarun Manohar, Aravind R.

Banner
Big Screen Productions

കക്കൂസില്‍ പോണമെന്നതു പോലും ആത്മഗതമായി ഉറക്കെ പറഞ്ഞും, പട്ടിയുടെ കുരയും പൂച്ചയുടെ കരച്ചിലും തുടങ്ങിയ മിമിക്രി നമ്പരുകള്‍ കാട്ടിയുമൊക്കെ ചിരിപ്പിക്കുവാന്‍ ശ്രമിക്കുന്ന ദിലീപിനെയാണ് ചിത്രത്തില്‍ കാണുവാനുള്ളത്, പേര് ചാര്‍ളി എന്നാണെന്നു മാത്രം. ഒരു നടനാണ് എന്നൊരു മേല്‍‌വിലാസം കിട്ടിപ്പോയതുകൊണ്ട് എന്തൊക്കെ കാട്ടിയാലാണ് ഒന്നു നിന്നു പെഴയ്‌ക്കുവാന്‍ പറ്റുകയെന്നോര്‍ത്തപ്പോള്‍ ദിലീപിനോട് (നോട്ട് ദി പോയിന്റ്, കഥാപാത്രത്തോടല്ല) സഹതാപം തോന്നി! ആദ്യം കാമുകനും പിന്നീട് വില്ലനുമാവുന്ന രാഹുലിനെ പരമ ബോറാക്കുന്നതില്‍ കുഞ്ചാക്കോ ബോബനും വിജയിച്ചിട്ടുണ്ട്. ഏഷ്യാനെറ്റിലെ ‘കോമഡി സ്റ്റാര്‍‌സി’ല്‍ നിന്നുമെത്തിയ നെല്‍‌സണ്‍ സ്കിറ്റുകളിലെ പ്രകടനം തന്നെ ഇതിലും പുറത്തെടുക്കുന്നു. നെല്‍സണ്‍ അവതരിപ്പിച്ച പപ്പനും ചാര്‍ളിയും ഒരുമിക്കുന്ന ചില രംഗങ്ങളില്‍ അല്‍പം ചിരിക്കുള്ള വകയുണ്ട്. സംവിധായകന്‍ ചിരിക്കാന്‍ പറയുമ്പോള്‍ ചിരിക്കുന്നു, കരയാന്‍ പറയുമ്പോള്‍ കരയുന്നു എന്നല്ലാതെ കാമില എന്ന കഥാപാത്രമായി മാറുവാനൊന്നും നായിക ഡാനിയേലയ്‌ക്കും കഴിഞ്ഞിട്ടില്ല. ബിജു മേനോന്‍, വിനയ പ്രസാദ്, ഗോപാലകൃഷ്ണന്‍, കലാരഞ്ജിനി, ക്ലെമന്റ്സ്, സേവ്യര്‍ തുടങ്ങിയവരൊക്കെയാണ് ഇതര വേഷങ്ങളില്‍.

ലോകനാഥന്റെ ക്യാമറ പകര്‍ത്തിയിരിക്കുന്ന സ്പെയിനിലെ ഇടങ്ങള്‍ കാഴ്ചയ്ക്ക് വിരുന്നാണ്. എഴുനേറ്റു പോകാതെ കണ്ടിരിക്കുവാന്‍ പ്രേരിപ്പിക്കുന്നതായി ചിത്രത്തിലുള്ള ഏക സംഗതി ഈ ദൃശ്യഭംഗി മാത്രമാണ് എന്നു പറഞ്ഞാല്‍ അതില്‍ അതിശയോക്തിയില്ല. ദൃശ്യങ്ങളുടെ ഒഴുക്കു നഷ്ടമാവാതെ രഞ്ജന്‍ എബ്രഹാം അവയൊക്കെ ഭംഗിയായി സന്നിവേശിപ്പിച്ചിട്ടുമുണ്ട്. ചില ദൃശ്യങ്ങള്‍ ദൂരെ നിന്നും പകര്‍ത്തി പിന്നീട് സ്റ്റുഡിയോയില്‍ ഡിജിറ്റല്‍ സൂം ചെയ്താണ് കാട്ടിയിരിക്കുന്നത്. തക്കാളിയേറുത്സവത്തിലേക്കോ കാളപ്പോരിലേക്കോ ഒന്നും ക്യാമറ ഇറങ്ങി ചെല്ലുന്നില്ല എന്നത് ചിത്രീകരണ സൗകര്യങ്ങളുടെ പരിമിതി കാരണമാവാം. മുകളില്‍ നിന്നുള്ള ഷോട്ടുകളിലൂടെ ആ രംഗങ്ങളൊക്കെ തട്ടിക്കൂട്ടിയിരിക്കുകയാണ്. കഥയിലെ ഒരു പ്രധാന വഴിത്തിരിവ് തക്കാളിയേറുത്സവത്തിനിടയിലാണ് സംഭവിക്കുന്നത് എന്നതിനാല്‍, മുകളില്‍ നിന്നുള്ള ഷോട്ടുകളിലൊതുക്കാതെ, മറ്റൊരിടത്ത് ക്ലോസപ്പ് ഷോട്ടുകള്‍ ചിത്രീകരിച്ച് വിദഗ്ദ്ധമായി സംയോജിപ്പിച്ചിരുന്നെങ്കില്‍ കൂടുതല്‍ അനുഭവത്താകുമായിരുന്നു ആ ഭാഗങ്ങള്‍. ഗോകുല്‍ ദാസിന്റെ കലാസംവിധാനം, സരുണ്‍ മനോഹറും അരവിന്ദും ചേര്‍ന്നുള്ള വസ്‌ത്രാലങ്കാരം എന്നിവ ചിത്രത്തിനുതകുന്നുണ്ട്. അരുണ്‍ സീനുവിന്റെ ശബ്ദവിന്യാസവും ദൃശ്യങ്ങള്‍ക്ക് പിന്തുണയേകി പശ്ചാത്തലമായുണ്ട്. കഥ സ്പെയിനിലായതിനാല്‍ ശ്രീജിത്ത് ഗുരുവായൂരിന് അഭിനേതാക്കളുടെ തലമുടിയിലും താടിയിലുമൊക്കെ തന്റെ കരവിരുത് പ്രകടിപ്പിക്കുവാന്‍ അവസരം കിട്ടിയത് അദ്ദേഹം തനിക്കാവും പോലെ ഉപയോഗിച്ചിരിക്കുന്നത് കാണാം.

നവാഗതനായ ആര്‍. വേണുഗോപാലെഴുതി വിദ്യാസാഗര്‍ ഈണമിട്ട നാല് ഗാനങ്ങളാണ് ചിത്രത്തിലുള്ളത്. കാര്‍ത്തിക്കും ശ്രെയ ഗോശാലും ചേര്‍ന്നു പാടിയ “ആരെഴുതിയാവോ...” എന്ന ഗാനമാണ് കൂട്ടത്തില്‍ കേമം. കാര്‍ത്തിക്കിന്റെ ആലാപനത്തില്‍ വാക്കുകള്‍ പലപ്പോഴും വ്യക്തമാവുന്നില്ല എന്നൊരു കുറവ് ഈ ഗാനത്തിനുമുണ്ട്. വിനീത് ശ്രീനിവാസനും സുജാതയും ചേര്‍ന്നാലപിച്ചിരിക്കുന്ന “അക്കരെ നിന്നൊരു പൂങ്കാറ്റി”ന് ഏറെ മികവ് പറയുവാനില്ല. പറ്റാത്ത പണിക്ക് ഉദിത് നാരായണനെയൊക്കെ എന്തിനാണ് വിളിച്ചു കൊണ്ടുവരുന്നതെന്ന് വീണ്ടും സംശയിപ്പിച്ചുകൊണ്ട് “ഇരുളില്‍ ഒരു കൈത്തിരി...” എന്നൊരു ഗാനവുമുണ്ട് ചിത്രത്തില്‍. (അതേ ഗാനം കാര്‍ത്തിക്കിന്റെ ശബ്ദത്തില്‍ ആല്‍ബത്തിലുണ്ട്. അതു കേട്ടാല്‍ മതിയാവും വ്യത്യാസം മനസിലാക്കുവാന്‍.) ശ്രോതാക്കളുടെ കണ്ട്രോളു കളയുവാന്‍ ഉതകുന്ന “അയ്യോ... അയ്യോ... ഹയ്യയ്യോ! കണ്ട്രോള്‍ പോയോ എന്റയ്യോ!” എന്നൊക്കെ യാസിന്‍ നാസിറിനെയും ഫ്രാങ്കോയെയും കൊണ്ടു പാടിച്ചൊരു ഗാനം കൂടി ചിത്രത്തില്‍ കാണാം.

‘ടേസ്റ്റ് ഓഫ് ലവ്’ എന്നാണ് ചിത്രത്തിന് നല്‍കിയിരിക്കുന്ന അടിക്കുറിപ്പ്. പക്ഷെ, പ്രണയത്തിന്റെ അരുചിയായി മാറുവാനാണ് ചിത്രത്തിന്റെ തലവര. ചിത്രം കഴിയുമ്പോള്‍ ഇതിലെവിടെയായിരുന്നു പ്രണയമെന്ന് ആരെങ്കിലും സംശയിച്ചാല്‍ അവരെ തെറ്റുപറയാനും പറ്റില്ല. ലാല്‍ ജോസിനും ദിലീപിനും സംഘത്തിനും സ്പെയിന്‍ കാണാനും അവിടെ കുറേക്കാലം ചുറ്റിയടിക്കാനുമായിരുന്നു ഉദ്ദേശമെങ്കില്‍ അതങ്ങ് ചെയ്‌താല്‍ പോരായിരുന്നോ? അതു പോരല്ലോ! വിനോദസഞ്ചാരത്തിനൊപ്പം ബൈ പ്രോഡക്ടായി ഒരു സിനിമ കൂടി ഉണ്ടായാല്‍ രണ്ടുണ്ട് പ്രയോജനം; പരിചരിക്കുവാന്‍ ആളുകളൊക്കെയായി താരപ്രഭയ്‌ക്ക് കോട്ടം വരാതെ സ്പെയിനില്‍ പല മാസങ്ങള്‍ കൂടുകയും ചെയ്യാം, ചിലവൊക്കെ നൗഷാദിന്റെ അക്കൗണ്ടില്‍ പോവുകയും ചെയ്യും! പക്ഷെ, ഒടുക്കം അതിന്റെ ശിക്ഷ ഏറ്റുവാങ്ങേണ്ടത് സ്പെയിന്‍ സ്വപ്നത്തില്‍ പോലും കാണത്ത കേരളത്തിലെ പാവം പ്രേക്ഷകരാണ് എന്നതാണിവിടുത്തെ ദുരന്തം. നൗഷാദിന്റെ സ്പോണ്‍‌സര്‍ഷിപ്പിലുള്ള അത്തരം ദുരന്തങ്ങള്‍ ‘സ്പാനിഷ് മസാല’യോടെ തീരണമേയെന്നൊരു പ്രാര്‍ത്ഥനയേ ഇവിടെ അവശേഷിക്കുന്നുള്ളൂ!

ഇരയിമ്മന്‍ തമ്പിയുടെ “ഓമനത്തിങ്കള്‍ കിടാവോ...” സ്പാനിഷ് രീതിയില്‍ പാടി കേള്‍പ്പിക്കുന്നുണ്ട് ചിത്രത്തില്‍. കുറേയൊക്കെ സഹിക്കാമെങ്കിലും, “പറി പൂര്‍ണേന്റു റ്റന്റി നിലാവോ...” എന്നൊക്കെ പാടിപ്പിച്ചത് കടന്നുപോയി!