സക്കറിയായുടെ ഗര്‍ഭിണികള്‍ (Review: Zachariayude Garbhinikal)

സക്കറിയായുടെ ഗര്‍ഭിണികള്‍: ആശ്വാസകരം ഈ ഗര്‍ഭചിത്രം!

ഹരീ, ചിത്രവിശേഷം

ഒരു ഗര്‍ഭചിത്രം കണ്ടതിന്റെ ക്ഷീണം മാറുന്നതേയുള്ളൂ മലയാളികള്‍ക്ക്; അപ്പോഴാണ് നാലു ഗര്‍ഭിണികളുമായി അനീഷ് അന്‍‌വറിന്റെ വരവ്. ഒരു ഗൈനക്കോളജി ഡോക്ടറും അദ്ദേഹത്തിന്റെ പരിചരണത്തിലുള്ള നാല് ഗര്‍ഭിണികളും - ‘സക്കറിയായുടെ ഗര്‍ഭിണികളു’ടെ കഥാപരിസരത്തില്‍ പുതുമയുണ്ട്. ഇന്ദ്രജിത്തിന്റെ ശബ്ദത്തില്‍ ഡോക്ടറേയും അയാളുടെയടുത്തെത്തുന്ന നാല് ഗര്‍ഭിണികളേയും പരിചയപ്പെടുത്തിയാണ് ചിത്രത്തിന്റെ തുടക്കം. ലാലാണ് ചിത്രത്തിലെ സക്കറിയ എന്ന ഗൈനക്കോളജിസ്റ്റിനെ അവതരിപ്പിക്കുന്നത്. സനൂഷ, ഗീത, സാന്ദ്ര തോമസ്, റിമ കല്ലിങ്കല്‍ എന്നിവരാണ് നാല് ഗര്‍ഭിണികള്‍. ഡോക്ടറുടെ ഗര്‍ഭിണിയാവാന്‍ യോഗമില്ലാത്ത ഭാര്യയായി ആശ ശരത്തുമുണ്ട്. ഫ്രൈഡേ സിനിമ ഹൌസിന്റെ ബാനറില്‍ വിജയ് ബാബുവും സാന്ദ്ര തോമസും ചേര്‍ന്നാണ് ചിത്രം നിര്‍മ്മിച്ചിരിക്കുന്നത്.

ആകെത്തുക : 6.00 / 10

കഥയും കഥാപാത്രങ്ങളും
സംവിധാനം
അഭിനയം
സാങ്കേതികം
പാട്ട് / നൃത്തം / ആക്ഷന്‍

: 4.00 / 10
: 6.00 / 10
: 7.00 / 10
: 4.00 / 05
: 3.00 / 05

Snippet Review

Unlike the previous 'pregnancy-film' released in Malayalam, Aneesh Anwar made 'Zachariayude Garbhinikal' convincingly better. Worth a watch!

ഒന്നിലേറെ കഥകളെ ഒരു ചരടില്‍ കോര്‍ത്തൊരാഖ്യാനം, അതിനുതകുന്നൊരു പ്രമേയമാണ് ചിത്രം സ്വീകരിച്ചിരിക്കുന്നത്. നാലു വ്യത്യസ്ത സാഹചര്യങ്ങളില്‍ നിന്നുമെത്തുന്ന നാലു ഗര്‍ഭിണികള്‍, അവരെ ബന്ധിപ്പിക്കുന്ന ഡോക്ടര്‍, അയാളുടെ കുടുംബം; ഈയിടങ്ങളിലൂടെ മാറിമാറി കഥപറഞ്ഞാണ് സിനിമ പുരോഗമിക്കുന്നത്. മോശമില്ലാത്ത തിരക്കഥയും കൈയ്യടക്കമുള്ള സംവിധാനവും ‘ സക്കറിയായുടെ ഗര്‍ഭിണിക’ളെ കണ്ടിരിക്കുവാന്‍ പാകത്തിലാക്കുന്നു. ചില കഥാപാത്രങ്ങളുടെയെങ്കിലും അച്ചടി വര്‍ത്തമാനവും, അഭിനേതാക്കളുടെ കൈയിലൊതുങ്ങാതെ പോയ ചില വൈകാരിക സന്ദര്‍ഭങ്ങളും കല്ലുകടികളായി ചിത്രത്തില്‍ അവശേഷിക്കുന്നു. ആരുമില്ലാതെ ഒറ്റയ്ക്കു കഴിയുന്ന പൂര്‍ണഗര്‍ഭിണി, ആംബുലന്‍സിനെയോ മറ്റോ വിളിക്കാതെ കാറോടിച്ചു പോവല്‍, കാണികള്‍ ആദ്യമേ ഊഹിക്കൊന്നൊരു കാര്യം പറയാന്‍ പത്മരാജന്റെ കഥയെക്കൂട്ടുപിടിച്ച് ഒടുവിലൊരു ഒളിച്ചുകളി - ഇങ്ങിനെ നെറ്റിചുളിപ്പിക്കുന്ന ചില കഥാസന്ദര്‍ഭങ്ങളും ചിത്രത്തിന്റെ പോരായ്മയാണ്. തിരക്കഥയില്‍ അനീഷ് അന്‍‌വറും സംഭാഷണങ്ങളുടെ രചനയില്‍ നിസാം രാവുത്തറും ഒരല്പം കൂടി ശ്രദ്ധ നല്‍കിയിരുന്നെങ്കില്‍ എന്നാഗ്രഹിച്ചു പോവുന്നു ചിത്രം കണ്ടിറങ്ങുമ്പോള്‍!

Cast & Crew
Zachariayude Garbhinikal

Directed by
Aneesh Anwar

Produced by
Vijay Babu, Sandra Thomas

Story, Screenplay / Dialogues by
Aneesh Anwar / Nizam Ravuther

Starring
Lal, Rima Kallingal, Sanusha, Geetha, Asha Sarath, Sandra Thomas, Aju Varghese, Joy Mathew, Shanavas, Kochu Preman, Sivaji Guruvayoor, Sneha Sreekumar, Devi Ajith etc.

Cinematography (Camera) by
Viishnu Naarayan

Editing by
Renjith Touchriver

Production Design (Art) by
Vineesh Banglan

Music by
Vishnu - Sharath

Background Score by
Prasanth Pillai

Lyrics by
Engandiyoor Chandrasekharan, Aneesh Anwar

Make-up by
Rajesh Nenmara

Costumes by
Sunil Rahman

Stills by
Bijith Dharmadam

Designs by
Friday Peeps

Banner
Friday Cinema House

Release Date
2013 Sep 27

സനൂഷയ്ക്ക് ഇതുവരെ മലയാളത്തില്‍ ലഭിച്ച നായികാപ്രാധാന്യമുള്ള വേഷങ്ങളില്‍ ശ്രദ്ധേയമായ ഒന്നാണ് ഇതിലെ ഗര്‍ഭിണിയായ പ്ലസ് ടു വിദ്യാര്‍ത്ഥിനി. ചുരുക്കം ചിലയിടങ്ങളിലെ അമിതാഭിനയം കണ്ടില്ലെന്നു വെച്ചാല്‍, നല്ലൊരു ശ്രമമെന്നു തന്നെ പറയാം. സ്വതസിദ്ധമായ ശൈലിയില്‍ സക്കറിയയായി ലാല്‍ ചിത്രത്തില്‍ നിറയുന്നു. റിമ കല്ലിങ്കലും അജു വര്‍ഗീസും വരുന്ന കഥാതന്തു പലപ്പോഴുമൊരു സ്കിന്റെ സ്വഭാവമാണ് കാണിക്കുന്നത്. അവരുടെ കഥാപാത്രങ്ങളും അതിനപ്പുറമൊരു വളര്‍ച്ച നേടുന്നില്ല. ഗീതയുടെ ഗര്‍ഭിണിയായ കന്യാസ്ത്രീയും മികവു പുലര്‍ത്തുന്നു. തനിക്കൊരു വേഷം നല്‍കിയാല്‍ മാത്രമേ പണമിറക്കൂ എന്ന പിടിവാശിയാവാം സാന്ദ്ര തോമസിനെ അനുരാധയാക്കുവാന്‍ സംവിധായകന്‍ നിര്‍ബന്ധിതനായത്! ജോയ് തോമസ്, ആശ ശരത്ത് എന്നിവരുള്‍പ്പെടുന്ന ഇതര അഭിനേതാക്കളുടെ പ്രകടനവും ചിത്രത്തിനുതകുന്നു.

എങ്ങണ്ടിയൂര്‍ ചന്ദ്രശേഖരനും അനീഷ് അന്‍‌വറുമെഴുതി വിഷ്ണു - ശരത്ത് ഈണമിട്ട മൂന്നു ഗാനങ്ങളാണ് ചിത്രത്തില്‍ വരുന്നത്. വിഷ്ണുവും ജ്യോത്സ്നയും പാടി, കുറച്ചു പേര്‍ ആടിത്തിമിര്‍ക്കുന്നതായി കാണിക്കുന്ന “വെയില്‍ ചില്ല പൂക്കും...” ചിത്രത്തില്‍ നന്നായി ഉപയോഗിച്ചിരിക്കുന്നു. ഈണത്തിലും പുതുമയുണ്ട്. പിന്നീടുള്ള ഗാനങ്ങള്‍ക്ക് പക്ഷേ ഈയൊരു മെച്ചമൊന്നും പറയുവാനില്ല - പാട്ടുകള്‍ക്കായി വരുന്ന പാട്ടുകള്‍, അത്ര തന്നെ! വിഷ്ണു നാരായണന്റെ ഛായാഗ്രഹണവും രഞ്ജിത്ത് ടച്ച്‌റിവറിന്റെ സന്നിവേശവും സാങ്കേതികമായും ചിത്രത്തെ മികച്ചതാക്കുന്നു. പ്രശാന്ത് പിള്ളയുടെ പശ്ചാത്തലസംഗീതവും ചിത്രത്തിനിണങ്ങുന്നു.

മാതൃത്വത്തെയും സ്ത്രീത്വത്തെയും ഉയര്‍ത്തിപ്പിടിക്കുന്നു എന്ന അവകാശവാദങ്ങളുമായെത്തിയ ബ്ലെസിയുടെ ‘കളിമണ്ണു’മായി തട്ടിച്ചു നോക്കിയാല്‍, ഇത്തരം വീരവാദങ്ങളുടെ അകമ്പടികളൊഴിവാക്കി, ‘സക്കറിയായുടെ ഗര്‍ഭിണിക’ള്‍ എത്രയോ മടങ്ങ് ഭംഗിയായി ഈ പറഞ്ഞ കാര്യങ്ങള്‍ സാധിച്ചിരിക്കുന്നു! പ്രമേയത്തില്‍ ഒഴിവാക്കുവാന്‍ കഴിയാത്ത, ബലാത്സഗം ചെയ്യപ്പെടുന്ന ബാലികയുടെ രംഗത്തിനായി ആനിമേഷനെ കൂട്ടുപിടിച്ചത് സംവിധായകന്‍ വിഷയത്തോട് കാട്ടിയ ആത്മാര്‍ത്ഥതയായി കാണാം. യഥാര്‍ത്ഥത്തിലത് ചിത്രീകരിച്ച് കഥാപാത്രത്തിന്റെ / സിനിമയുടെ പൂര്‍ണത എന്ന വരട്ടുവാദങ്ങളുമായി എത്തുന്നതിലും മാന്യതയുണ്ടിതിന്. ആശുപത്രിയുടേയോ സേവനങ്ങളുടേയോ പരസ്യചിത്രമാവാതെ തന്റെ സിനിമ മാറാതെ കാക്കുവാനും സംവിധായകന്‍ ഇതില്‍ മനസുവെച്ചിട്ടുണ്ട്. തിയേറ്ററുകളില്‍ ശ്രദ്ധ നേടിയില്ലെങ്കിലും പരിചരണരീതികളില്‍ പ്രതീക്ഷ നല്‍കിയ ‘മുല്ലമൊട്ടും മുന്തിരിച്ചാറു’മെന്ന ചിത്രത്തിലൂടെയാണ് അനീഷ് അന്‍‌വറിന്റെ തുടക്കം. ആ പ്രതീക്ഷകള്‍ക്കു മങ്ങലേല്‍പ്പിക്കാതെ, അനീഷിന്റെ അടുത്ത ചിത്രത്തിനായി കാക്കുവാനൊരു പ്രേരകമായി ‘സക്കറിയായുടെ ഗര്‍ഭിണികള്‍’ നിലകൊള്ളുന്നു.

ലേബര്‍ റൂം വിശേഷം: കഥാപാത്രത്തിന്റെ പൂര്‍ണതയ്ക്കു വേണ്ടി സനൂഷ ഗര്‍ഭിണിയാകുവാന്‍ അനീഷ് അന്‍‌വര്‍ കാത്തിരിക്കാഞ്ഞത് ഏതായാലും നന്നായി. ‘കളിമണ്ണി’ലെ ശ്വേതയുടെ പ്രസവത്തേക്കാളും എത്രയോ ഭംഗിയായി ഇതിലെ സനൂഷ അവതരിപ്പിച്ച കഥാപാത്രത്തിന്റെ പ്രസവം!