മെമ്മറീസ് (Review: Memories)

മെമ്മറീസ്: ശിഥിലമീ ഓർമ്മകൾ!

ഹരീ, ചിത്രവിശേഷം

മലയാളത്തിലുണ്ടായിട്ടുള്ള കുറ്റാന്വേഷണ ചിത്രങ്ങളിൽ മികച്ചവയുടെ പട്ടികയിൽ ചേർക്കാവുന്നൊരു ചിത്രമെന്ന അഭിപ്രായം നേടുവാനായ 'ഡിറ്റക്ടീവി'ലൂടെയായിരുന്നു ജീത്തു ജോസഫെന്ന സംവിധായകന്റെ അരങ്ങേറ്റം. എന്നാലെന്തുകൊണ്ടോ ജീത്തുവിന്റെ പിന്നീടുവന്ന ചിത്രങ്ങൾ ത്രില്ലർ സ്വഭാവത്തിലുള്ളവ ആയിരുന്നില്ല. 'മമ്മി & മി'യ്ക്കും 'മൈ ബോസി'നുമൊന്നും അദ്യചിത്രത്തോളമൊരു മതിപ്പ് പ്രേക്ഷകർക്കിടയിലുണ്ടാക്കുവാനും സാധിച്ചില്ല. ദിലീപ് - മംമ്ത കൂട്ടുകെട്ടിന്റെ പച്ചയിൽ ബോക്സ് ഓഫീസ് വിജയം നേടുവാനായി എന്നതു മാത്രം 'മൈ ബോസി'നു നേട്ടമായി പറയാം. പൃഥ്വിരാജ് നായകനാവുന്ന 'മെമ്മറീസി'ൽ ജീത്തു ജോസഫ് തന്റെ ആദ്യ ചിത്രത്തിന്റെ ജനുസ്സിലേക്ക് മടങ്ങിയെത്തുന്നു. എക്കാലവും ഓർമ്മിക്കപ്പെടുവാൻ മാത്രമൊന്നും മികവിലേക്കെത്തുന്നില്ലെങ്കിലും; ഇതേ ജനുസ്സിൽ വരുന്ന, അയുക്തികളുടെ കൂമ്പാരമായ, മറ്റു ചിത്രങ്ങളെ അപേക്ഷിച്ച് അല്പം ഭേദമാണ് 'മെമ്മറീസെ'ന്നു പറയാം. അവന്ത വിഷൻസിന്റെ ബാനറിൽ പി.കെ. മുരളീധരനും ശാന്ത മുരളിയുമൊരുമിച്ച് ചിത്രം നിർമ്മിച്ചിരിക്കുന്നു.

ആകെത്തുക : 5.50 / 10

കഥയും കഥാപാത്രങ്ങളും
സംവിധാനം
അഭിനയം
സാങ്കേതികം
പാട്ട് / നൃത്തം / ആക്ഷന്‍

: 4.50 / 10
: 5.00 / 10
: 6.00 / 10
: 3.00 / 05
: 3.50 / 05

Snippet Review

Jeethu makes 'Memories' scattered as he tries to pull a family drama from a psychological thriller thread!

ത്രില്ലർ സ്വഭാവത്തിലുള്ള ചിത്രത്തെ കുടുംബചിത്രമാക്കുവാൻ വല്ലാതെ പ്രയാസപ്പെടുന്നുണ്ട് ജീത്തു 'മെമ്മറീസി'ൽ. അമ്മ-മകൻ ബന്ധവും, ചേട്ടൻ-അനിയൻ പിണക്കവുമൊക്കെയായി ആവർത്തനവിരസമായ ഒരുപിടി രംഗങ്ങൾ ചിത്രത്തിനു ബാധ്യതയാണ്. ഇതൊഴിച്ചു നിർത്തി മിച്ചമുള്ളതെടുത്താൽ ശരാശരി നിലവാരമുള്ളൊരു മലയാളം ത്രില്ലറായി 'മെമ്മറീസ്' അനുഭവപ്പെടും. അവിശ്വസനീയമായ ട്വിസ്റ്റുകളും യാദൃശ്ചികതകൾ നിറഞ്ഞ അന്വേഷണവുമൊന്നും തിരുകാതെ വിശ്വസനീയമായൊരു കഥയാണ് ജീത്തുവിനിതിൽ പറയാനുള്ളത് എന്നതാണ് ആശ്വാസത്തിനു വക നൽകുന്നത്. പ്രധാന വില്ലൻ കിറുക്കനാണ് എന്നു പറഞ്ഞാൽ കിട്ടുന്നൊരു സൗകര്യം സംവിധായകൻ നന്നായി ഉപയോഗിച്ചിട്ടുണ്ട് എന്നതു കൂടി ഇതിനോടു ചേർത്തു വായിക്കണം.

Cast & Crew
Memories

Directed by
Jeethu Joseph

Produced by
P.K. Muralidharan, Santha Murali

Story, Screenplay, Dialogues by
Jeethu Joseph

Starring
Prithviraj, Meghana Raj, Rahul Madhav, S.P. Sreekumar, Mia George, Suresh Krishna, Sreejith Ravi, Vijayaraghavan, Nedumudi Venu, Irshad, Praveena, Seema G. Nair, Madhupal etc.

Cinematography (Camera) by
Sujith Vassudev

Editing by
John Kutty

Production Design (Art) by
Saburam

Background Score by
Anil Johnson

Music by
Sejo John

Lyrics by
Sejo John, Shelton

Make-up by
Roshan

Costumes by
Linda Jeethu

Thrills by
Name

Stills by
Abhilash Narayanan

Designs by
Collins Leophil

Banner
Avantha Visions

Release Date
2013 Aug 09

പൃഥ്വിരാജ് അവതരിപ്പിക്കുന്ന സാം അലക്സിലൂടെയാണ് ചിത്രം ഏതാണ്ട് മുഴുവനായും സഞ്ചരിക്കുന്നത്. ഇതര കഥാപാത്രങ്ങൾക്കൊന്നും ഒരു പ്രാധാന്യവും ഒരിടത്തും വരുന്നില്ല എന്നുമാത്രമല്ല അവയൊക്കെയും ത്രില്ലർ സിനിമകളിൽ സ്ഥിരമായി പ്രതിഷ്ഠിക്കപ്പെടുന്ന കഥാപാത്രങ്ങൾ മാത്രമായി ചുരുങ്ങുകയും ചെയ്യുന്നു. സാം അലക്സിനെ മകനെപ്പോലെ കരുതുന്ന വിജയരാഘവന്റെ പോലീസ് മേധാവി, വനിത കൃഷ്ണകുമാറിന്റെ അമ്മ, രാഹുൽ മാധവിന്റെ അനിയൻ, മിയ ജോർജ്ജിന്റെ പത്രപ്രവർത്തക; ഇവരൊക്കെയും സംവിധായകൻ പറഞ്ഞു കൊടുത്തതു ചെയ്യുന്നു എന്നതിനപ്പുറം സാമുമായി ഏതെങ്കിലും തരത്തിലൊരു ബന്ധമുള്ളതായി അനുഭവപ്പെട്ടില്ല. ദേവദാസ് മോഡലിലുള്ള സാം അലക്സിന്റെ ജീവിതചര്യ നീട്ടി വലിച്ചു കാണിച്ചു കാണിച്ച് പ്രേക്ഷകരുടെ സഹതാപം കഥാപാത്രത്തിൽ നിന്നും അഭിനേതാവിലേക്ക് മാറുന്നൊരു അവസ്ഥയും ഇടയ്ക്കുണ്ട്. ശ്രീജിത്ത് രവി, നെടുമുടി വേണു, സുരേഷ് കൃഷ്ണ, മധുപാൽ, സീമ ജി. നായർ, ഇർഷാദ്, പ്രവീണ തുടങ്ങി മറ്റു ചിലരുമുണ്ട് ചിത്രത്തിൽ അഭിനേതാക്കളായി.

സാങ്കേതികമായി ചിത്രത്തിന് ശരാശരി നിലവാരത്തിലേക്ക് എത്തുവാനായെങ്കിലും ഒരു ത്രില്ലറിൽ നിന്നു പ്രതീക്ഷിക്കുന്ന വേഗതയോ ഉദ്വേഗമോ ഒന്നും സിനിമയിൽ കാണുവാനില്ല. ഒരു കുടുംബചിത്രമായ സൈക്കോളജി ത്രില്ലറിനു (ഇതു രണ്ടുമാവാൻ ശ്രമിച്ചു, രണ്ടുമായില്ല എന്നു ചുരുക്കം) ചേരുന്ന പരിചരണം ഒരു പക്ഷേ ഇതായിരിക്കാം. അങ്ങിനെയല്ലാതെ ഒരു സൈക്കോളജി ത്രില്ലറായി മാത്രം ഈ ചിത്രത്തെ ഉദ്ദേശിക്കുകയും, അതിനു ചേരുന്ന പരിചരണം സ്വീകരിക്കുകയും ചെയ്തിരുന്നെങ്കിൽ അത് ചിത്രത്തിനു ഗുണകരമാവുമായിരുന്നു. ചിത്രത്തിന്റെ പരിചരണത്തിൽ വന്ന ഈയൊരു അയഞ്ഞ സമീപനം ഉള്ള 'മെമ്മറീസി'നെ ശിഥിലമാക്കുന്നു എന്നതാണവസ്ഥ!

കമാൻഡോ മോഡലിലുള്ള ഒരു ഓപ്പറേഷനു ശേഷം, വീണുകിടക്കുന്ന കുറ്റവാളികൾ മരിച്ചുവെന്ന് ഉറപ്പുവരുത്തുകയോ അറസ്റ്റ് ചെയ്യുകയോ ചെയ്യാതെ അവിടെ ഉപേക്ഷിച്ചു പോവുക; തെളിവുകൾ അവശേഷിപ്പിക്കാതെ കുറ്റം ചെയ്യുവാൻ ശ്രമിക്കുന്നയാൾ എളുപ്പത്തിൽ കണ്ടുപിടിക്കപ്പെടാവുന്ന തരത്തിൽ പെരുമാറുക; ഇങ്ങിനെ സാമാന്യബുദ്ധിക്കു നിരക്കാത്ത സംഗതികൾ ചിലതെങ്കിലും ചിത്രത്തിൽ ബാക്കിയാണ്. പ്രായോഗികത കണക്കിലെടുക്കാതെ നാടകീയതയ്ക്ക് പ്രാധാന്യം നൽകുമ്പോൾ കുറ്റാന്വേഷണ സിനിമകളെ സംബന്ധിച്ചിടത്തോളം കാര്യങ്ങൾ യുക്തിക്ക് നിരക്കാതെ പോവും. സിനിമയിലെ പ്രധാന കേസന്വേഷണത്തിന്റെ വഴികൾ പക്ഷേ യുക്തിസഹമായി കൂട്ടിയിണക്കുവാൻ ജീത്തുവിന് സാധിച്ചിട്ടുണ്ട് എന്നതിനാൽ ഇടവേളയ്ക്കു ശേഷം ചിത്രത്തോടല്പം താല്പര്യമൊക്കെ കാണികൾക്കു തോന്നിയേക്കാം. എന്നാൽ പോലും വെറുതേ കണ്ടു മറക്കാവുന്നൊരു ചിത്രം എന്നല്ലാതെ, കണ്ടിറങ്ങുന്നവരുടെ മനസിൽ ഓർത്തുവെയ്ക്കുവാനൊരു 'മെമ്മറീസും' ചിത്രം ബാക്കിയാക്കുന്നില്ല എന്നതാണ് ഒറ്റവരിയിൽ ചിത്രത്തെക്കുറിച്ച് പറയാവുന്ന വിശേഷം.