ഇമ്മാനുവല്‍ (Review: Immanuel)

ഇമ്മാനുവല്‍ : ദൈവം നമ്മോടു കൂടെ; ശരിക്കും?

ഹരീ, ചിത്രവിശേഷം

'ദൈവം നമ്മോടു കൂടെ...' എന്നാണത്രേ ഇമ്മാനുവല്‍ എന്ന പദത്തിനര്‍ത്ഥം. എന്നാല്‍ ലാല്‍ ജോസ് സംവിധാനം ചെയ്ത് മമ്മൂട്ടി ടൈറ്റില്‍ റോളിലെത്തുന്ന 'ഇമ്മാനുവല്‍' കണ്ടിറങ്ങുന്നവര്‍ ഒന്ന്‍ സംശയിക്കും, ശരിക്കും ദൈവം നമ്മോടു കൂടെയുണ്ടോ? ദോഷം പറയരുത്, ഇതിലും വലുതെന്തോ വരാനിരുന്നത് ഇങ്ങിനെയങ്ങ് തീര്‍ന്നു എന്നാശ്വസിക്കേണ്ടവര്‍ക്ക് അങ്ങിനെ ആശ്വസിക്കുവാനുള്ളത് ചിത്രത്തിലുണ്ട്. മമ്മൂട്ടിക്കൊപ്പം ഫഹദ് ഫാസില്‍, റീനു മാത്യൂസ് എന്നിവരും ഈ ചിത്രത്തില്‍ പ്രധാന വേഷങ്ങളിലെത്തുന്നു. പ്രദീപ് നായരുടെ കഥയ്ക്ക് എ.സി. വിജീഷ് തിരക്കഥയെഴുത്തിയ 'ഇമ്മാനുവല്‍' സിന്‍ സില്‍ സെല്ലുലോയ്ഡിന്റെ ബാനറില്‍ എസ്. ജോര്‍ജ്ജ് നിര്‍മ്മിച്ചിരിക്കുന്നു.

ആകെത്തുക : 4.00 / 10

കഥയും കഥാപാത്രങ്ങളും
സംവിധാനം
അഭിനയം
സാങ്കേതികം
പാട്ട് / നൃത്തം / ആക്ഷന്‍

: 2.00 / 10
: 4.00 / 10
: 5.00 / 10
: 3.00 / 05
: 2.00 / 05

Snippet Review

In the name of god, the director makes everyone in the film happy but not the audience!

ഒരു പഴയകാല പബ്ലിഷിംഗ് കമ്പനിയില്‍ ജോലി നോക്കുന്ന ഇമ്മാനുവല്‍, പ്രസ്തുത സ്ഥാപനം അടച്ചു പൂട്ടുന്നതോടെ ഒരു പുതുതലമുറ ഇന്‍ഷുറന്‍സ് കമ്പനിയില്‍ ജോലിക്കു കയറുവാന്‍ നിര്‍ബന്ധിതനാവുന്നു. തുടര്‍ന്നുള്ള ഇമ്മാനുവലിന്റെ ജീവിതമാണ് ഈ സിനിമ. നല്ലൊരു കഥയാക്കി വികസിപ്പിക്കുവാനുള്ള സംഗതിയൊക്കെ കഥാതന്തുവിലുണ്ട്. എന്നാലങ്ങിനെയൊന്ന് എഴുതിയുണ്ടാക്കുവാന്‍ പ്രദീപ് നായര്‍ക്ക് കഴിഞ്ഞില്ല. ആ എഴുതിയതെടുത്ത് എ.സി. വിജീഷ് തിരക്കഥയാക്കിയപ്പോളാവട്ടെ അതിന് കഥാതന്തുവിലുള്ള കൗതുകം പോലും നഷ്ടമാവുകയും ചെയ്തു. സാങ്കേതിക മേന്‍മയോടെ അതെടുത്ത് ചിത്രീകരിക്കുക എന്നതിനപ്പുറം എന്തെങ്കിലും പ്രമേയത്തിലോ ചിത്രത്തിലോ കൊണ്ടുവരുവാന്‍ ലാല്‍ ജോസും ശ്രമിച്ചില്ല. പിന്നെ, ഫഹദിനെക്കൊണ്ട് മമ്മൂട്ടിയാണ് ശരിക്കുള്ള ഹീറോ എന്നു പറയിക്കലും (അവര്‍ കഥാപാത്രങ്ങളാണെന്നേ തോന്നില്ല ആ സമയം!), മമ്മൂട്ടി അതുകേട്ട് കോള്‍മയിര്‍ കൊള്ളുകയും ഒക്കെ ചെയ്യുന്ന തരികിടകളുമുണ്ട്, ആരാധകര്‍ക്ക് വേണമെങ്കില്‍ കൈയ്യടിക്കുവാന്‍... എന്താ അല്ലേ?

Cast & Crew
Immanuel

Directed by
Lal Jose

Produced by
S. George

Story / Screenplay, Dialogues by
Pradeep Nair / A.C. Vijeesh

Starring
Mammootty, Fahadh Faasil, Reenu Mathews, Sunil Sukhada, Nedumudi Venu, Muktha, Sukumari, Salim Kumar, P. Balachandran, Guiness Pakru, Mukesh, Anil Murali, Devi Ajith, Devan, Nandu, Balachandran Chullikkad, Ramesh Pisharody etc.

Cinematography (Camera) by
Pradeep Nair

Editing by
Ranjan Abraham

Production Design (Art) by
Mohandas

Music / Background Score by
Afzal Yusuf

Lyrics by
Rafeeq Ahmed

Make-Up by
Sreejith Guruvayoor

Costumes by
Sameera Saneesh

Effects by
Arun Seenu

Thrills by
Mafia Sasi

Stills by
Momi

Designs by
Jissen Paul

Banner
Cyn-Cyl Celluloid

Release Date
2013 Apr 05

കുറേ ഞെക്കിപ്പഴുപ്പിച്ച കഥാപാത്രങ്ങള്‍ വന്നു കാര്യം പറഞ്ഞു പോവുന്നു എന്നതിനപ്പുറം സാധ്യതയുള്ള കഥാപാത്രം പേരിനൊന്നു പോലുമില്ല ചിത്രത്തില്‍. അപ്പോള്‍ പിന്നെ, അഭിനേതാക്കളെ വിലയിരുത്തുന്നതില്‍ വിശേഷിച്ച് കാര്യമൊന്നുമില്ലല്ലോ! മമ്മൂട്ടിയുടെ ഇമ്മാനുവലായാലും ഫഹദിന്റെ ജീവനായാലും പ്രത്യേകിച്ചൊരു അനക്കവും കാണികളില്‍ ഉണ്ടാക്കുന്നില്ല. സുകുമാരി, സുനില്‍ സുഖദ, മുക്ത തുടങ്ങിയവരുടെ ചെറു കഥാപാത്രങ്ങളാണ് പിന്നെയും മനസില്‍ നില്‍ക്കുന്നത്. നെടുമുടി വേണു, പി. ബാലചന്ദ്രന്‍, സലിം കുമാര്‍ എന്നിവരൊക്കെ തങ്ങളുടെ പതിവ് മട്ടിലും ഭാവത്തിലുമൊക്കെ തന്നെ ചിത്രത്തിലുണ്ട്! ഇമ്മാനുവേലിന്റെ ഭാര്യയായി റീനു മാത്യൂസും മകനായെത്തിയ മാസ്റ്റര്‍ ??? (പേര്?) ഒക്കെ കാണാതെ പഠിച്ചു ചെയ്യുന്ന പ്രതീതി നല്കുന്നു. ചുരുക്കം ചില ഷോട്ടുകളില്‍ വന്നു പോവുന്നവരായി മുകേഷ്, ദേവി അജിത്ത്, അനില്‍ മുരളി, ഗിന്നസ് പക്രു, നന്ദു, ദേവന്‍ ഇങ്ങിനെ അഭിനേതാക്കള്‍ ഇനിയുമുണ്ട് പലരും.

ചിത്രമാവശ്യപ്പെടുന്ന സാങ്കേതികമികവൊക്കെ നല്കുവാന്‍ അണിയറയില്‍ പ്രവര്‍ത്തിച്ചവര്‍ക്ക് കഴിഞ്ഞിട്ടുണ്ട്. അങ്ങിനെ വിശേഷിച്ചൊരു മികവും ആവശ്യപ്പെടുന്നില്ല എന്നു കൂടി കൂട്ടത്തില്‍ പറയണം. റഫീഖ് അഹമ്മദെഴുതി അഫ്സല്‍ യൂസഫ് ഈണമിട്ട ഗാനങ്ങള്‍ ചിത്രത്തിനു ബാധ്യതയല്ലാതെ ഒന്നുമല്ല. ഗാനരംഗങ്ങളുടെ അറുബോറന്‍ ചിത്രീകരണം കൂടിയാവുമ്പോള്‍ സിനിമയിലെ ഏച്ചുകെട്ടലുകള്‍ മാത്രമായി ഗാനങ്ങള്‍ മാറുന്നു.

ലാല്‍ ജോസ് ഈ ചിത്രം കൊണ്ട് എന്താണുദ്ദേശിച്ചതെന്ന് ഇനിയും മനസിലായിട്ടില്ല. ലാഭക്കൊതി പൂണ്ട കോര്‍പ്പറേറ്റുകളുടെ മനുഷ്യത്വരഹിതമായ ബിസിനസിനെ വിമര്‍ശിച്ചതാണോ? അതോ പുതുതലമുറ ജോലിയിടങ്ങള്‍ അല്പം പ്രായമായവര്‍ക്ക് പറഞ്ഞിട്ടുള്ളതല്ലെന്ന മുന്നറിയിപ്പാണോ? ഇനി ഇതൊന്നുമല്ല കാര്യങ്ങളിങ്ങനെയൊക്കെ ആണെന്നാലും ദൈവം നമ്മോടു കൂടിയുണ്ടെന്ന് സമാധാനിച്ചോളാനുള്ള സാരോപദേശമോ? ചിത്രത്തിനോടുവില്‍ ദൈവം എല്ലാവരുടേയും കൂടെയുണ്ടെന്ന് കാണിക്കാനാവും എല്ലാ കഥാപാത്രങ്ങളും ഹാപ്പിയാണെന്ന് പറഞ്ഞും കാണിച്ചുമാണ് സംവിധായകന്‍ ചിത്രം അവസാനിപ്പിക്കുന്നത്. (അങ്ങിനെയല്ലാത്ത കഥാപാത്രങ്ങളെ സിനിമയുടെ ഇടയ്ക്കു തന്നെ സംവിധായകന്‍ ഉപേക്ഷിക്കുന്നുണ്ട്, ദൈവത്തിനു പോലും സഹായിക്കുവാന്‍ കഴിയാത്തവരെ പിന്നെ ലാല്‍ ജോസിനാണോ സഹായിക്കുവാനാവുക, ഹല്ല പിന്നെ!) ദൈവത്തിന്റെ നാമത്തില്‍ സിനിമയിലുള്ളവരെയൊക്കെ ഹാപ്പിയാക്കിയ കൂട്ടത്തില്‍ കാണാന്‍ വന്നിരിക്കുന്നവരെക്കൂടി ഹാപ്പിയാക്കണമെന്ന തോന്നല്‍ ലാല്‍ ജോസിന് ഉണ്ടാവണമായിരുന്നു. അങ്ങിനെ തോന്നിപ്പിക്കാത്ത ആ ദൈവം ശരിക്കും ആരുടെ കൂടെയാണെന്നാണ് ഇപ്പോള്‍ സംശയം!

എന്തരോ എന്തോ: ബാലചന്ദ്രന്‍ ചുള്ളിക്കാട് എന്നു കേള്‍ക്കുമ്പോഴേ വസ്ത്രാലങ്കാരം ചെയ്യുന്നവര്‍ ഒരു കാഷായ വേഷമെടുത്ത് പെട്ടിയിലിടും എന്നായിട്ടുണ്ട് ഇപ്പോള്‍! എത്രാമത് സിനിമയിലാണ് അദ്ദേഹം ഇതേ വേഷത്തിലെത്തുന്നത്! സീരിയലുകള്‍ പുറമേയും!