സിംഹാസനം (Review: Simhasanam)

സിംഹാസനം: ഒരു ഷാജി കൈലാസ് ചിത്രം!

ഹരീ, ചിത്രവിശേഷം

'ചെമ്മീന്‍ തുള്ളിയാല്‍ മുട്ടോള'മെന്നു തന്നെ പ്രതീക്ഷിച്ചാണ്‌ ഷാജി കൈലാസിന്റെ ചിത്രങ്ങള്‍ക്ക് അല്‍പം വിവേകമുള്ള ആരും തലവെയ്‍ക്കുന്നത്. ആകെ അറിയാവുന്നൊരു കഥയുമായി ഷാജിയെപ്പോലെയുള്ള സിനിമാസംവിധായകര്‍ പിന്നെയും കിടന്നു തുള്ളുമ്പോള്‍ വറചട്ടിയിലാവുന്നത് പാവം പ്രേക്ഷകരാണെന്ന ദുര്യോഗം അപ്പോഴും അവശേഷിക്കുന്നു. പറഞ്ഞു വരുന്നത് പൃഥ്വിരാജിനെ നായകനാക്കി ഷാജി കൈലാസിന്റെ സംവിധാനത്തില്‍ തിയേറ്ററുകളിലെത്തിയ 'സിംഹാസന'ത്തെക്കുറിച്ചാണ്. ഷാജി കൈലാസിന്റെ പോയ വര്‍ഷങ്ങളിലെ സാഹസങ്ങളായ 'ദ്രോണ'യ്‍ക്കോ 'ആഗസ്റ്റ് 15'-നോ അതുമല്ലെങ്കില്‍ 'ദി കിംഗ് & ദി കമ്മീഷണറി'നോ തലവെച്ചവരില്‍ ആരെങ്കിലുമൊക്കെ ഇതു കാണുവാന്‍ തുനിയാനുള്ള സാധ്യതകള്‍ വിരളമാണ്‌. പിന്നെ, പൃഥ്വിരാജ് നായകനാവുന്ന ആദ്യ ഷാജി കൈലാസ് ചിത്രമെന്ന പരിഗണനയിലോ മറ്റോ ആരെങ്കിലും കയറിയാലായി! മാളവിക പ്രൊഡക്ഷന്‍സിന്റെ ബാനറില്‍ എസ്. ചന്ദ്രകുമാറാണ്‌ ഇതിനു വേണ്ടി കാശു തുലച്ചിരിക്കുന്നത്. ദേശക്കാരുടെ സം‍രക്ഷകനായ നായകന്റെ അച്ഛന്‍, ആ സ്ഥാനത്ത് തികച്ചും അപ്രതീക്ഷിതമായ സാഹചര്യങ്ങളുടെ സമ്മര്‍ദങ്ങളാല്‍ [ചുമ്മാ ;-)] കയറിയിരിക്കേണ്ടി വരുന്ന നായകന്‍, പിന്നെ അച്ഛന്റെ പ്രജകളുടെ സം‍രക്ഷണമങ്ങ് സ്വയമേറ്റെടുക്കല്‍, അടങ്ങാത്ത പകയുമായി പ്രതികാരത്തിനെത്തുന്ന വില്ലന്മാരെ ഒതുക്കല്‍‍, ആചാരങ്ങള്‍ പാലിക്കാനായി രാജാവായി അവരോഹണം - ഇങ്ങിനെ ഷാജി കൈലാസത്തിന്‌ ആകെ അറിയാവുന്ന നമ്പരുകളൊക്കെ ഇറക്കിയാണ്‌ കളി. 'സിംഹാസന'ത്തിന്റെ ഇരുപ്പുവശം ഇപ്പോള്‍ തന്നെ വായനക്കാര്‍ക്ക് മനസിലായി കാണുമെന്നു കരുതുന്നു!

ആകെത്തുക : 1.75 / 10

കഥയും കഥാപാത്രങ്ങളും
സംവിധാനം
അഭിനയം
സാങ്കേതികം
പാട്ട് / നൃത്തം / ആക്ഷന്‍

: 0.00 / 10
: 0.00 / 10
: 4.00 / 10
: 2.00 / 05
: 1.00 / 05

"ഹിംസയെ ഹിംസകൊണ്ട് ഇല്ലാതാക്കുന്നതാണ്‌ അഹിംസ" - ഇങ്ങിനെയൊരു വ്യാഖ്യാനം അഹിംസയ്‍ക്ക് ഇന്നോളമാരും നല്‍കി കണ്ടിട്ടില്ല. മറ്റൊരു സാമ്പിള്‍: "മനുഷ്യനേക്കാള്‍ വലുതാണ്‌ ശാസ്‍ത്രം. ഇവിടെ ശാസ്‍ത്രമെന്നാല്‍ ആചാരം. ആചാരങ്ങളെ മറന്നതാണ്‌ ഇന്നത്തെ ദോഷങ്ങള്‍ക്കു കാരണം..." - എങ്ങനുണ്ട്? ഇതിനൊരു തെളിവുമുണ്ട്. പത്മനാഭസ്വാമി ക്ഷേത്രത്തിലെ സ്വത്തൊക്കെ എന്തുകൊണ്ടാണ്‌ രാജകുടുംബാംഗങ്ങള്‍ക്ക് സം‍രക്ഷിക്കുവാനായത്? എന്താ സംശയം, അവര്‍ ഈ പറഞ്ഞ ആചാരങ്ങള്‍ പാലിച്ചു! ഏതായാലും ജനാധിപത്യമൊക്കെ വിട്ട് ആ പഴയ രാജഭരണകാലം തിരിച്ചു വന്നെങ്കില്‍ എത്ര നന്നായിരുന്നു എന്നൊരു ചിന്ത രചയിതാവ് + സംവിധായകന്‌ എന്നു തോന്നുന്നു. അതു പറയാന്‍ വിട്ടു, ഇത് ഷാജി കൈലാസിന്റെ ആദ്യ രചന കൂടിയാണെന്ന പുതുമയുമുണ്ട് ഈ ചിത്രത്തിന്! അതായത് 'പണ്ടേ ദുര്‍ബല, പോരാത്തതിന്‌ ഗര്‍ഭിണിയും' എന്ന അവസ്ഥ!

Cast & Crew
Simhasanam

Directed by
Shaji Kailas

Produced by
S. Chandrakumar

Story, Screenplay, Dialogues by
Shaji Kailas

Starring
Prithviraj, Vandana Menon, Aishwarya Devan, Saikumar, Biju Pappan, Thilakan, Siddique, Devan, Jayan Cherthala, V.K. Sreeraman, Riyaz Khan, Manikuttan, Kunchan, Vijayakumar, Rajeev, Shammi Thilakan etc.

Cinematography (Camera) by
Shaji, Saravanan, Vishnu Namboothiri

Editing by
Don Max

Production Design (Art) by
Boban

Music by
Ronnie Raphel

Background Score by
Biji Bal

Lyrics by
Chittoor Gopi, Sarath Vayalar

Make-Up by
Rajesh Nenmara

Costumes by
Kumar Edappal

Choreography by
Brinda

Action (Stunts / Thrills) by
Mafia Sasi

Banner
Malavika Productions

Release Date
2012 August 10

എന്തായാലും പൃഥ്വിരാജിനെ സമ്മതിക്കണം. ആക്ഷന്‍ ഹീറോയായി കസറിയതിനല്ല, മറിച്ച് "എന്റെ അച്ഛന്റെ പ്രജകളെ സം‍രക്ഷിക്കുവാനുള്ള..." എന്നൊക്കെ വികസിക്കുന്ന ഡയലോഗുകളൊക്കെ ഒരുളുപ്പുമില്ലാതെ വെച്ചു കാച്ചുന്നൊരു കഥാപാത്രത്തെ ഈ കാലത്തും അവതരിപ്പിക്കുവാന്‍ കാണിച്ച തൊലിക്കട്ടിയാണ്‌ സമ്മതിച്ചു കൊടുക്കേണ്ടത്. ഒരല്‍പം കൂടി ശ്രദ്ധിച്ചൊക്കെ സിനിമകള്‍ തിരഞ്ഞെടുക്കണമെന്നേ ബ്രദറിനോട് അപേക്ഷിക്കുവാനുള്ളൂ! മുന്‍കാലങ്ങളിലൊക്കെ വന്നിട്ടുള്ള കഥാപാത്രങ്ങളുടെ ഛായയില്‍ തന്നെയെങ്കിലും, സായി കുമാറിന്റെയും സിദ്ദിഖിന്റെയും വേഷങ്ങള്‍ മോശമായില്ല. ഒരല്‍പം പ്രാധാന്യമൊക്കെ ബിജു പപ്പന്റെയും വി.കെ. ശ്രീരാമന്റെയും വേഷങ്ങള്‍ക്കും ഉണ്ടെന്നു പറയാം. നായികമാരുള്‍പ്പടെ മറ്റു വേഷങ്ങളൊക്കെ ആളെ തികയ്‍ക്കുവാനായി ഹാജരുവെയ്‍ക്കുന്നു എന്നല്ലാതെ കാര്യമായൊരു പ്രാധാന്യവും ചിത്രത്തില്‍ നേടുന്നില്ല.

ഷാജി കൈലാസിന്റെ സംവിധാനഗുണം കൊണ്ട് പണി മതിയാക്കി പോയതാണോ എന്നറിയില്ല, മൂന്നു പേരു ചേര്‍ന്നാണ്‌ ചിത്രത്തിന്റെ ഛായാഗ്രഹണം പൂര്‍ത്തിയാക്കിയിരിക്കുന്നത്. മൂന്നു പേരും ചേര്‍ന്ന് പറ്റും പോലെയൊക്കെ ദൃശ്യങ്ങള്‍ പകര്‍ത്തി വെച്ചിട്ടുണ്ട്. മാഫിയ ശശിയുടെ സംഘട്ടന രംഗങ്ങളും ബൃന്ദ ഒരുക്കിയ നൃത്തരംഗങ്ങളും പൃഥ്വിരാജും മറ്റുള്ളവരും ഭംഗിയായി ചെയ്തിട്ടുണ്ട്. ചിത്രത്തില്‍ അല്‍പമെങ്കിലും ആസ്വാദ്യകരമായി തോന്നിയതും ഈ ഭാഗങ്ങള്‍ മാത്രമാണ്. കിണ്ടി, കോളാമ്പി, വെറ്റില, ചാരുകസേര, രണ്ടാം മുണ്ട് തുടങ്ങിയ കരണവരുടെ 'ആക്സസറികള്‍'; പ്രതാപം കാട്ടുവാന്‍ മുറ്റത്തെപ്പോഴും തളച്ചിട്ടൊരാന, തെക്കുവടക്കു നടക്കുന്ന അരയന്നങ്ങള്‍, വീടിനുള്ളില്‍ വെള്ളം നിറച്ച് പൂവിതറിയ വാര്‍പ്പുകള്‍; ഇങ്ങിനെ പോവുന്ന ബോബന്റെ കലാസംവിധാനം ബഹുരസമാണ്. ചിറ്റൂര്‍ ഗോപിയും വയലാര്‍ ശരത്തും എഴുതി റോണി റാഫേല്‍ ഈണമിട്ട ഗാനങ്ങളു പോലും സിനിമകണ്ടിരുന്നപ്പോള്‍ ഒരാശ്വാസമായില്ല. "ചെമ്പട, ചെമ്പട, ചെമ്പട..."യെന്ന ഗാനമൊക്കെ കേട്ടിരിക്കുവാന്‍ തന്നെ പാടാണു താനും. ഗാനരംഗങ്ങളുടെ സൗണ്ട് റിക്കാര്‍ഡിംഗിലും എന്തൊക്കെയോ തകരാറുകള്‍ അനുഭവപ്പെട്ടു.

'അതു താനല്ലയോ ഇതെന്ന്' വര്‍ണ്യത്തിലാശങ്ക വരുന്ന സിനിമകളുടെ ലിസ്റ്റെടുത്താല്‍ അങ്ങ് 'നാടുവാഴികള്‍' മുതല്‍ 'ആറാം തമ്പുരാന്‍', 'ലേലം', 'നരസിംഹം' വഴി ഇങ്ങ് 'താണ്ഡവം' വരെയത് നീളും. (പിന്നീടുള്ളതുമുണ്ടാവാം, പക്ഷെ ഓര്‍മ്മയില്‍ വരുന്നില്ല!) ജനാധിപത്യ വിരുദ്ധ ആശയങ്ങള്‍ വിളംബരം ചെയ്യുന്ന ഇവയുടെയെല്ലാം കഷണവും മുറിയുമൊക്കെ ചേര്‍ത്തുണ്ടാക്കിയൊരു സാധനമാണിതിന്റെ തിരക്കഥയെന്നതും പോരാഞ്ഞ് ഷാജി കൈലാസത്തിനുള്ള രാജഭക്തിയും രാജവാഴ്ചയോടുള്ള പ്രേമവും ഇവയിലധിഷ്ഠിതമായുള്ള വികലമായ ആശയങ്ങളും ചില വരട്ട് വാദങ്ങളും ഒക്കെ കൂടിയാവുമ്പോള്‍ ആദ്യന്തം അപകടകരമായ ഒരു ചിത്രമായി 'സിംഹാസനം' മാറുന്നു. ഒരാശ്വാസമുള്ളത് എടുത്തത് ഷാജി കൈലാസാണ്‌ എന്നതു മാത്രമാണ്. കാരണം, ഇദ്ദേഹത്തിന്റെ പടമായതു കൊണ്ട് അധികമാരും കാണാതെയും കേള്‍ക്കാതെയും ഇതങ്ങ് പൊയ്‍ക്കോളും!

ഇന്നത്തെ ചിന്താകുഴപ്പം: 'പും എന്ന നരകത്തില്‍ നിന്നും അച്ഛനെ ത്രാണനം ചെയ്യുന്നവന്‍ പുത്രന്‍' എന്ന വാചകം കൂടിയങ്ങ് ഇതിലുപയോഗിക്കാമായിരുന്നു ഷാജിക്ക്. അതു മാത്രമായെന്താണോ വിട്ടു കളഞ്ഞത്! (പക്ഷെ, ഇതേ അര്‍ത്ഥം പറഞ്ഞുവെയ്‍ക്കുന്നുണ്ട് കേട്ടോ!)