പാപ്പീ അപ്പച്ചാ (Paappi Appacha)

1972-ല്‍ പുറത്തിറങ്ങിയ ‘മയിലാടുംകുന്ന്’ എന്ന ചിത്രത്തിലെ, “പാപ്പീ... അപ്പച്ചാ...” എന്ന ഗാനത്തില്‍ നിന്നും പാപ്പിയേയും അപ്പച്ചനേയും പറിച്ചു നട്ട് മമാസ് സംവിധാനം ചെയ്ത ചിത്രമാണ് ‘പാ‍പ്പീ അപ്പച്ചാ’. ചിത്രത്തിന്റെ കഥ, തിരക്കഥ, സംഭാഷണം എന്നിവയും മമാസിന്റെ തന്നെ. ദിലീപ്, ഇന്നസെന്റ്, കാവ്യ മാധവന്‍ തുടങ്ങിയവരാണ് ചിത്രത്തിലെ പ്രധാന അഭിനേതാക്കള്‍. പ്രിയാഞ്ജലി ഫിലിംസിന്റെ ബാനറില്‍ അനൂപാണ് ചിത്രത്തിനുവേണ്ടി പണം മുടക്കിയ ‘മൊതലാളി’. ദേവരാജന്‍ ഈണമിട്ട് വയലാര്‍ വരികളിലാക്കിയ ‘പാപ്പീ... അപ്പച്ചാ...’ എന്ന ഗാനം നര്‍മ്മം കലര്‍ന്ന ഒരോര്‍മ്മയാണെങ്കില്‍; മമാസിന്റെ ചിത്രം കാണുന്നതോടെ പാപ്പി, അപ്പച്ചന്‍ ഇതു രണ്ടും ഒരുമിച്ചു കേള്‍ക്കുന്നതു തന്നെ അസുഖകരമായ ഒരു അനുഭവമാവുന്നു.

ആകെത്തുക     : 3.75 / 10

കഥയും കഥാപാത്രങ്ങളും
സംവിധാനം
അഭിനയം
സാങ്കേതികം
പാട്ട് / നൃത്തം / ആക്ഷന്‍

: 1.50 / 10
: 4.00 / 10
: 4.00 / 10
: 2.50 / 05
: 3.00 / 05

പാപ്പിയും അപ്പച്ചനുമുള്‍പ്പടെ അവിശ്വസിനീയമായ ഒരുപിടി കഥാപാത്രങ്ങളെവെച്ച് മലയാളം സിനിമയില്‍ പലവട്ടം കണ്ടുകഴിഞ്ഞ കുറേ സന്ദര്‍ഭങ്ങള്‍ അവിയേലുപരുവത്തില്‍ ചേര്‍ത്തൊരുക്കിയതാണ് മമാസിന്റെ ‘പാപ്പീ അപ്പച്ചാ’. ‘മയിലാടുംകുന്നി’ലെ ഗാനം കേള്‍ക്കാന്‍ പോയ പോക്കില്‍ ആ കാലത്തെ കുറേ സിനിമകള്‍ കൂടി മമാസ് കണ്ടുപോയെന്നു തോന്നുന്നു. ഏറെയൊന്നും വളര്‍ന്നില്ലെങ്കിലും, നായികയെ റേപ്പ് ചെയ്യാന്‍ നില്‍ക്കുന്ന വില്ലന്‍ മുഖവുരയായി പതിനഞ്ച് മിനിറ്റ് കഥ അയവിറക്കുന്നതില്‍ നിന്നുമൊക്കെ മലയാളസിനിമ വളര്‍ന്നിട്ടുണ്ട്. ഈയൊരു മനസിലാക്കലിന്റെ കുറവ് ചിത്രത്തില്‍ നന്നായി അറിയുവാനുണ്ട്.

Cast & Crew
Paappi Appacha

Directed by
Mamas

Produced by
Anup

Story / Screenplay, Dialogues
Mamas

Starring
Dileep, Innocent, Kavya Madhavan, KPAC Lalitha, Ashokan, Dharmajan, Suresh Krishna, Rajeevan, Manjusha, Kochu Preman, Narayanankutty, Shobha Mohan, Machan Varghese etc.

Cinematography (Camera) by
Sanjeev Shankar

Editing by
V.T. Sreejith

Art Direction by
Gireesh Menon

Music by
Vidyasagar

Lyrics by
Gireesh Puthenchery, Vayalar Sarath Chandra Varma

Make-Up by
Salim Kadakkal

Costumes by
Anil Chemboor

Choreography by
Brinda, Prasanna

Action (Stunts / Thrills) by
Stun Siva

Banner
Priyanjali Films

കള്ളൊഴിച്ചു കൊടുത്ത് അച്ഛനും മൊനും സ്നേഹിക്കുന്നത് ‘വീണ്ടും ചില വീട്ടുകാര്യങ്ങള്‍’, ‘മനസിനക്കരെ’ തുടങ്ങി പല ചിത്രങ്ങളിലായി നാം കണ്ടു കഴിഞ്ഞതാണ്. ഇതിനപ്പുറമൊരു അച്ഛന്‍ മകന്‍ ബന്ധം ഈ ചിത്രത്തിലും കാണുവാനില്ല. ഒരു കോമഡി ചിത്രമാണെന്ന് പറയിപ്പിക്കുവാനാവണം, ആദ്യഭാഗത്ത് കുറേ ചളിപ്പുകള്‍ ഏച്ചുകെട്ടലുകളായുണ്ട്. വല്യ കുഴപ്പമില്ലെന്നു തോന്നുന്ന ഒരു പടമെന്ന തെറ്റിദ്ധാരണ ആദ്യ മിനിറ്റുകളില്‍ ഉണ്ടാക്കുവാന്‍ മമാസിനു കഴിഞ്ഞിട്ടുണ്ട്. എന്നാല്‍ പിന്നങ്ങോട്ട് തീര്‍ത്തും കൈവിട്ട കളിയാണ് സംവിധായകന്റേത്. തട്ടിയും തടഞ്ഞും കഴിയുന്നത്ര മടുപ്പിച്ച്, പടം തീരുവാനെടുക്കുന്ന സമയമാവട്ടെ, രണ്ടേമുക്കാല്‍ മണിക്കൂറും!

സി.ഐ.ഡി. മൂസ മുണ്ടും ജൂബ്ബയുമിട്ടാല്‍ എങ്ങിനെയുണ്ടാവുമോ, അതാണ് പാപ്പി. ദിലീപില്‍ നിന്നും ഇതിലേറെയൊന്നും പ്രതീക്ഷിക്കുന്നതില്‍ അര്‍ത്ഥമില്ല. ഇന്നസെന്റിന്റെ അപ്പച്ചനും കാര്യമായ പുതുമകളില്ല. അശോകന് അടുത്ത കാലത്ത് കിട്ടിയ കഥാപാത്രങ്ങളില്‍ മികച്ച ഒന്നാണ് ഇതിലെ ശശാങ്കന്‍ മുതലാളി. അശോകനത് ഭംഗിയാക്കുകയും ചെയ്തു. സുരേഷ് കൃഷ്ണ അവതരിപ്പിച്ച മാണിക്കുഞ്ഞും ശ്രദ്ധേയം. നായകന്റെ പെണ്ണാവുക, വില്ലന്റെ ഇരയാവുക എന്നതിലപ്പുറമൊന്നുമില്ലെങ്കിലും, ഒന്നു രണ്ട് നല്ല സംഭാഷണങ്ങളുടെ പച്ചയില്‍ കാവ്യയുടെ ആനി ടീച്ചര്‍ ശ്രദ്ധ നേടുന്നു. മറ്റ് അഭിനേതാക്കളില്‍ കെ.പി.എ.സി. ലളിത, ധര്‍മജന്‍, ശോഭ മോഹന്‍, രാജീവന്‍, മഞ്ജുഷ, മച്ചാന്‍ വര്‍ഗീസ്, കൊച്ചു പ്രേമന്‍ തുടങ്ങിയവരൊക്കെ തരക്കേടില്ലാതെ പോവുന്നു.

മുന്‍‌ചിത്രങ്ങളുമായി (രൗദ്രം, വൈരം, ജനകന്‍) താരതമ്യം ചെയ്താല്‍, ദൃശ്യങ്ങള്‍ ഫോക്കസിലാക്കുവാന്‍ കഴിഞ്ഞു എന്നതാണ് ഛായാഗ്രാഹകന്‍ സഞ്ജീവ് ശങ്കറിന്റെ വിജയം. വെട്ടിമാറ്റുവാന്‍ ഇനിയുമേറെ അവശേഷിപ്പിച്ചാണ് ചിത്രസന്നിവേശകന്‍ വി.ടി. ശ്രീജിത്ത് ജോലി തീര്‍ത്തിരിക്കുന്നത്. ഗിരീഷ് മേനോന്റെ കല, സലിം കടയ്ക്കലിന്റെ ചമയങ്ങള്‍, അനില്‍ ചെമ്പൂരിന്റെ വസ്ത്രാലങ്കാരം എന്നിവ ചിത്രത്തില്‍ മികവു പുലര്‍ത്തുന്നു. വിദ്യാസാഗറിന്റെ പശ്ചാത്തലസംഗീതം അധികസമയവും ബഹളം മാത്രമാണ്. സ്റ്റണ്‍ ശിവ ഒരുക്കിയിരിക്കുന്ന സംഘട്ടനരംഗങ്ങള്‍ നന്ന്. ദിലീപിനെക്കൊണ്ട് ഇത്രയുമൊക്കെ ചെയ്യിച്ചെടുക്കുവാന്‍ സ്റ്റണ്‍ ശിവക്ക് കഴിഞ്ഞത് ചെറിയ കാര്യമല്ല. പ്രത്യേകിച്ചും; ഛായാഗ്രാഹകന്‍, ചിത്രസംയോജകന്‍ എന്നിവരില്‍ നിന്നും കാര്യമായൊരു സംഭാവനയും ലഭിച്ചില്ല എന്നതുകൂടി കണക്കിലെടുക്കുമ്പോള്‍.

ഗിരീഷ് പുത്തഞ്ചേരി, വയലാര്‍ ശരത്ചന്ദ്ര വര്‍മ്മ എന്നിവരെഴുതി വിദ്യാസാഗര്‍ സംഗീതം നല്‍കിയിരിക്കുന്ന രണ്ടുഗാനങ്ങളാണ് ചിത്രത്തില്‍ കണ്ടത്. രഞ്ജിത്തും ജെമോനും തൊള്ളകീറിയ “പാപ്പീ... അപ്പച്ചാ...”, പിന്നെ കാര്‍ത്തിക്കിനൊപ്പം ജെമോന്‍ ചേര്‍ന്നു തൊള്ളകീറിയ “കാട്ടുമാക്കാനായാലും...”; രണ്ടു ഗാനങ്ങളും അസഹനീയം. ഉദിത് നാരായണനും സുജാതയും ഒരുമിച്ചാലപിച്ച “തമ്മില്‍ തമ്മില്‍...”, മധു ബാലകൃഷ്ണനും സുജാതയും ചേര്‍ന്നു പാടിയ “മഞ്ഞിന്‍ വെള്ളിത്തൂവല്‍...” എന്നീ ഗാനങ്ങള്‍ തിയേറ്ററുകാര്‍ ഒഴിവാക്കിയതിനാല്‍ സഹിക്കേണ്ടിവന്നില്ല. ബ്രിന്ദയും പ്രസന്നയും ചേര്‍ന്നാണ് ചിത്രത്തിലെ ഗാനങ്ങള്‍ക്ക് ചുവടുകളിട്ടിരിക്കുന്നത്. ചിത്രത്തിനും ഗാനങ്ങള്‍ക്കുമുള്ള നിലവാരം നൃത്തത്തിനും അവകാശപ്പെടാം.

ഗായകര്‍ക്ക് ‘തൊള്ളകീറിയവര്‍’, ചിത്രസംയോജനത്തിന് ‘വെട്ടിക്കൂട്ട്‍’, നിര്‍മ്മാതാവിന് ‘മൊതലാളി’ എന്നിങ്ങനെയൊക്കെ കാണിക്കുന്ന തുടക്കത്തിലെ ടൈറ്റിലുകള്‍ രസകരമാണ്. സിനിമയിലെ ഭൂതകാല വിവരണത്തിനും സ്വപ്നങ്ങള്‍ക്കും മറ്റും നിശ്ചല ചിത്രങ്ങളും ചലനാത്മക ചിത്രങ്ങളും ഉപയോഗിച്ചിരിക്കുന്നതിലും പുതുമയുണ്ട്. ‘പാപ്പീ അപ്പച്ചാ’യുടെ ട്രൈലര്‍, ഔദ്യോഗിക വെബ്സൈറ്റ് എന്നിവയും പ്രതീക്ഷ കൂട്ടുവാനുതകുന്നവയാണ്. ചിത്രത്തിന്റെ പേരുണര്‍ത്തുന്ന രസത്തിന്റെ അല്പമാത്രമെങ്കിലും ചിത്രത്തിനു നല്‍കുവാന്‍ കഴിഞ്ഞിരുന്നെങ്കില്‍ രണ്ടായിരത്തിപ്പത്തിലെ ഹിറ്റുകളിലൊന്നായി മാറുവാന്‍ ‘പാപ്പീ അപ്പച്ചാ’യ്ക്ക് സാധ്യതയുണ്ടായിരുന്നു. അതില്ലാത്തതിനാല്‍, പാപ്പിയും അപ്പച്ചനും മിനിസ്ക്രീനില്‍ ‘ബ്ലോക്ക് ബസ്റ്ററാ’യി അവതരിക്കുന്നതുവരെ കാത്തിരിക്കുകയാവും ഉചിതം.

വിശേഷകവാക്യം: ഈയിടയായി ചിത്രങ്ങളുടെ തുടക്കത്തില്‍ ‘പുകവലിയും മദ്യപാനവും ആരോഗ്യത്തിന് ഹാനികരം’ എന്നെഴുതി കാണുന്നു. കൂട്ടത്തിലൊരു വരിയായി ‘ഈ സിനിമ കാണുന്നത് മാനസികാരോഗ്യത്തിന് ഹാനികരം’ എന്നൊരു മുന്നറിയിപ്പു കൂടി ചേര്‍ക്കാവുന്നതാണ്.

--